Киир

Киир

Бу күннэргэ уопсастыбаҕа «Хапcыһыы» диэн улахан экраҥҥа саҥа тахсыбыт уус-уран киинэ тула улахан мөккүөр, хайдыһыы таҕыста. Ол төрүөтүнэн киинэ режиссера Никандр Федоров (саҥа ылыммыт сахалыы аатынан Айыы Тыыннаах Эр Санаа-Ох Хотор) сойууска сахалартан бастакы чөмпүйүөн Вячеслав Карпов туһунан мөкү өйдөбүлү үөскэтэр уобараһы, быһыыны-майгыны, дьайыылары киллэрбитэ буолла. Мөккүөр улам бэйэтэ «хабыр хапсыһыыга» кубулуйан, бүгүн «Сахамедиа» пресс-киинигэр режиссеру кытта сирэй көрсөн кэпсэтии, быһаарсыы тэрилиннэ.

Пресс-кэмпириэнсийэҕэ режиссер бу киинэни уһуларыгар Вячеслав Карповы кытта чугастык алтыспыт дьонтон хайаларын да кытта көрсөн кэпсэппэтэҕэ, аҥаардастыы «Очурга оҕустарыы, кыайыыга кынаттаныы» кинигэтигэр эрэ олоҕуран, ону «туустаан-тумалаан», эбии бэйэтиттэн айан, чөмпүйүөн олоҕор буолбатах бэрдэ суох түгэннэри киллэрэн уһулбута билиннэ. Маны ааһан, кини киинэҕэ Вячеслав Карпов оруолун бэйэтэ толорбут.  

Кэпсэтиигэ кэлбит дьон бары кэриэтэ тыйаатырдарга хайыы-сахха көстө турар киинэни утаран тыл эттилэр. Олор истэригэр биллиилээх суруналыыс, уопуттаах педагог Владислав Коротов, Олимпиада көҥүл тустууга призера, СССР успуордун үтүөлээх маастара, САССР үтүөлээх тириэньэрэ Александр Иванов, «Хотугу сулус» академия дириэктэрэ, СӨ култууратын үтүөлээх үлэһитэ Татьяна Гоголева, сахалартан бастакы гроссмейстер Александр Азаров, Чурапчы улууһун мунньаҕын бэрэссэдээтэлэ Яков Оконешников  уонна да атыттар бааллар. Кинилэр режиссер, этиллибит сэмэлээһиннэри туоратан, киинэтин көннөрөн таһаарыгар модьуйдулар эбэтэр көннөрбөт түгэнигэр көрдөрүүтүн тохтотуох буоллулар.

Арыый сымнаҕастык көҥүл тустууга аан дойду чөмпүйүөнэ, СССР успуордун үтүөлээх маастара Павел Пинигин, СӨ физическэй култуураҕа уонна успуорка миниистирэ Леонид Спиридонов эттилэр. Оттон режиссеру өйөөн уонна киинэни көмүскээн, уопсастыбаннай диэйэтэл Семен Оготоев, суруналыыс Николай Бястинов уонна Вячеслав Карпов уола Павел эттилэр.

Павел Карпов бу киинэни уһулууга ийэтинээн сүбэлэһэн баран көҥүл биэрбиттэрин, ол эрээри киинэни эрдэ көрбөтөхтөрүн эттэ, хата мантан сиэттэрэн аҕаларыгар улахан болҕомто ууруллан эрэрин бэлиэтээтэ. Оттон режиссер Айыы Тыыннаах Эр Санаа-Ох Хотор бу киинэни Вячеслав Карповка сүгүрүйэн туран уһулбутун, аҕам саастаах дьон киинэни өйдөөбөтөхтөрүттэн уонна сыыһа ылыммыттарыттан хомойорун, ол эрээри киинэҕэ тугу да уларыппат бигэ санаалааҕын биллэрдэ.

Манна даҕатан эттэххэ, кини бу киинэни 2021 с. Арсен Томскай «Синет-Спарк» тэрилтэтэ ыыппыт куонкуруһугар кыайан ылбыт 2 500 000 солкуобайынан уһулар кыахтаммыта. Онон, бэйэтин харчытынан хайдах киинэни уһуларын бэйэтэ билэрин тоһоҕолоото.

Кэпсэтиини « Саха сирин биллиилээх дьонун туһунан тахсар айымньыларга, киинэлэргэ, испэктээктэргэ сыһыаннаах сокуон, нуормалыыр аахта оҥоһуллара, айыллан тахсыахтарын иннинэ көҥүл биэрэр уус-уран сүбэ тэриллэрэ ирдэнэр» диэн санаанан түмүктээтилэр. Миниистир Леонид Спиридонов бу боппуруоска бэйэтэ үлэлэһиэх буолла.  

Пресс-кэмпириэнсийэ туһунан сиһилии матырыйаалы кэлэр нэдиэлэҕэ «Кыым» хаһыакка ааҕаарыҥ.

Тэрээһини сырдатта Күндэли.