Бүгүн, кулун тутар 18 күнүгэр, Дьокуускайга Арассыыйа олимпийскай кэмитиэтин бэрэсидьиэнэ Станислав Поздняков, кэмитиэт генеральнай сэкирэтээрэ, «Азия оҕолоро» норуоттар икки ардыларынааҕы кэмитиэт вице-бэрэсидьиэнэ Родион Плитухин, оонньуу илдьит киһитэ, хоккейга икки төгүллээх олимпийскай чөмпүйүөн Вячеслав Фетисов уонна да атын VIII «Азия оҕолоро» оонньуу бочуоттаах ыалдьыттара кэллилэр.
«Туймаада» аэропордугар кинилэри «Азия оҕолоро» норуоттар икки ардыларынааҕы кэмитиэт бэрэсидьиэнэ Владимир Максимов, СӨ физическэй култуураҕа уонна успуорка миниистирэ Леонид Спиридонов, VIII оонньуу дириэксийэтин генеральнай дириэктэрэ Михаил Сивцев көрүстүлэр.
Оонньуу уотун уматыы кулун тутар 19 күнүгэр «Өлүөнэ туруук хайалара» национальнай паарка тэллэҕэр ыытыллыа. Тэрээһин чэрчитинэн «Хоккей номохторо» уонна «Саха сирин сборнайа» хамаандалар икки ардыларыгар «Сэлии лигата» хоккей матчата буолуоҕа.
«Хоккей номохторо» диэн ханна да суох ураты бырайыак. Биһиги дойду устун сылдьан сатабыл дьарыктарын ыытабыт, тэрээһиннэргэ, аахсыйаларга кыттабыт. Ити курдук аҕа көлүөнэттэн үөрэммиппитин үүнэр көлүөнэҕэ тиэрдэргэ кыһаллабыт. Аан дойду хоккейын географиятыгар Өлүөнэ туруук хайалара номох буолбут хоккеистар олохтоохтору кытта хоккей оонньообут сирдэрин быһыытынан киириэҕэ. Биһиги кэлэн барбыппыт кэннэ манна хоккей сайдыа уонна идэтийбит кулууптар үөскүөхтэрэ диэн эрэнэбит», - диэн Вячеслав Фетисов санаатын эттэ.
Бүгүн өссө биллиилээх хоккеистар – олимпийскэй чөмпүйүөннэр Алексей Гусаров, Андрей Коваленко, Вячеслав Буцаев, олимпийскэй оонньуу үрүҥ көмүс уонна боруонса мэтээлин хаһаайына Борис Миронов кэллилэр. Сарсын кинилэргэ олимпийскэй чөмпүйүөн Сергей Шепелев, аан дойду үс төгүллээх чөмпүйүөнэ Ирек Гимаев эбиллиэхтэрэ. Өссө бочуоттаах ыалдьыттар ортолоругар икки төгүллээх олимпийскай чөмпүйүөн Анна Богалий баар.
Уот эстафетата кулун тутар 20 күнүгэр «Азия оҕолоро» оонньууну төрүттээччи, Саха сирин Бастакы бэрэсидьиэнэ Михаил Николаев төрөөбүт Хаҥалас улууһугар саҕаланыаҕа уонна бэс ыйын 26 күнүгэр Дьокуускайга оонньуу аһыллыытыгар «Туймаада» стадиоҥҥа түмүктэниэҕэ.
Норуоттар икки ардыларынааҕы VIII «Азия оҕолоро» оонньуу быйыл төрүттэммит сиригэр – Дьокуускай куоракка – бэс ыйын 25 күнүттэн от ыйын 7 күнүгэр диэри ыытыллыаҕа. Эдэр спортсменнар спорт 24 көрүҥэр күрэхтэһиэхтэрэ.
