Бүгүн Өлүөнэ турууктарын анныгар “Азия Оҕолоро” норуоттар икки ардыларынааҕы күрэхтэһии уотун уматыахтара.
Ол эрэ иннинэ Ил Дархан Айсен Николаев РФ Олимпиадаҕа кэмитиэтин бэрэсидьиэнэ Станислав Позднякову кытта көрүстэ. Кинилэр бу сайын Дьокуускайга ыытыллыахтаах күрэхтэһии туһунан дьүүллэстилэр.
“Азия оҕолоругар” бэлэмнэнии хайдах бара турарын, чуолаан тэрээһин боппуруостарын, ол иһигэр логистиканы, омук дэлэгээссийэлэрэ түһэр-олорор сирдэрин, туһунан кэпсэттибит. Ону таһынан, Күрэхтэһии чэрчитинэн ыытыллыахтаах эдэр олимпиецтар норуоттар икки ардыларынааҕы пуорумнарын туһунан дьүүллэстибит. Станислав Алексеевич бэлэмнэнии үрдүк таһымнаахтык бара турарын бэлиэтээтэ уонна Саха сирэ ити курдук улахан тэрээһини ыыта үөрүйэҕин учуоттаан, “Азия оҕолоро” эмиэ үрдүк таһымнаахтык ааһыахтара диэн эрэнэрин биллэрдэ”, – диэн Ил Дархан телеграм-каналыгар суруйар.
“Азия оҕолорун” уотун бүгүн Өлүөнэ турууктарын тэллэҕэр уматыахтара. Тэрээһиҥҥэ Олимпиада чөмпүйүөннэрэ уонна призердара кыттыахтара. Уот эстэпиэтэтэ өрөспүүбүлүкэ бары улууһун хабыаҕа. Онно барыта 500-тэн тахса факел тутааччы кыттыаҕа.
