Киир

Киир

Бэҕэһээ, кулун тутар 26 күнүгэр, Нам улууһун Түбэтигэр улахан кылаас оҕолоругар төрүт многоборьеҕа «Үрүҥ уолан» күрэс саҕаланна.

Бу күрэстэн бэйэтин кэмигэр Намтан төрүттээх «Дыгын оонньууларын» бөҕөстөрө тахсыбыттара. Быйылгы бириис пуондата – 300 тыһ. солк. Турнир СӨ үөрэҕириитин туйгуна Петр Попов сырдык кэриэһигэр уон тохсус төгүлүн ыытыллар.

Быйыл манна Дьокуускайтан, Чурапчыттан, Амматтан, Намтан, Мэҥэ-Хаҥаластан 22 күүстээх уол кэллэ. Уолаттар биэс көрүҥҥэ киирсэллэр: үс куобах, тутум эргиир, хапсаҕай, мас тардыһыы, кууллаах сүүрүү.

WhatsApp Image 2024 03 26 at 18.50.11 1

Түбэ нэһилиэгин баһылыга Григорий Гуляев:

«Түбэ, кырдьык, боотурдар дойдулара. Уон тоҕус сыл тухары бу күрэхтэһииттэн элбэх спортсмен тахсыбыта. Ол курдук, “Дыгын оонньууларын” кыайыылаахтара Николай Дьяконов, Вячеслав Дьяконов, хас да төгүллээх призер Артем Варданян уонна да атыттар араас сылларга кыттыбыттара, кыайбыттара, өссө даҕаны кэлэр кэм «Дыгыннара» тахсыахтара турдаҕа», - диэн эрэлин биллэрдэ. Кини Ил Түмэн махтал суругун «Дыгын оонньууларын» хас да төгүллээх чөмпүйүөнүн ийэтигэр Анна Захароваҕа туттарда.

WhatsApp Image 2024 03 26 at 18.50.11

Нам улууһун үөрэх управлениетын начальнигын солбуйааччы Светлана Поротова:

«Үрүҥ уолан» турнир улууска, өрөспүүбүлүкэҕэ оҕо спордун уонна чуолаан саха многоборьета сайдарыгар улахан кылааты киллэрэр, мантан кынаттанан оҕо спордунан утумнаахтык дьарыктанар», - диэн санаатын эттэ. Кини үөрэх управлениетын аатыттан күрэс тэрийээччитэ Петр Попов кэргэнигэр Дария Поповаҕа махтал суругу туттарда.

WhatsApp Image 2024 03 26 at 18.50.11 2

Күрэһи СӨ физическэй култуура уонна успуорт министиэристибэтэ, Баһылай Манчаары аатынан “Модун” успуорт төрүт көрүҥнэрин киинэ, многоборье федерацията, чааһынай успуонсардар өйөбүллэринэн Түбэ нэһилиэгин дьаһалтата, Түбэ орто оскуолата, Петр Попов дьиэ кэргэнэ сыл аайы тэрийэн ыыталлар.

Сонун төрдө: Нам улууһун Түбэ нэһилиэгин дьаһалтата.

Санааҕын суруй

Бүтэһик сонуннар