Муус устар 6 күнүгэр сахалартан Сэбиэскэй Сойууска көҥүл тустууга бастакы чөмпүйүөн, дуобат-саахымат киинин дириэктэринэн үлэлии сылдьыбыт Вячеслав Павлович Карпов кэриэһигэр нуучча дуобатыгар өрөспүүбүлүкэтээҕи иккис турнир буолан ааста.
86 саастаах математика учуутала Көстөкүүн Романов куоракка кыстаан олорор. Дуобаттыырын сөбүлүүр. Кини Вячеслав Карпов кэриэһигэр дуобат турнирыгар кыттыыны ылла. Элбэх дуобатчыт куорат дуобатын кулуубар кэлбит. Маастардар, кандидаттар. Чурапчы Чакырын баһылыга, спорт министирин солбуйааччы уо.д.а. тыл эппиттэр, эбиэт биэрбиттэр.
Көстөкүүн 1 эрэ разрядтаах дуобатчыт. Ол эрээри оскуолаҕа үлэлии сылдьан дуобат маастардарын, өрөспүүбүлүкэ чөмпүйүөннэрин Уйбаан Пинигины, Тамара Тарабукинаны уо.д.а. дуобакка иитэн таһаарбыта. Дуобат былыргы түөрүөтүгэ.
Кини турнирга кыттарыгар биир киирсиигэ Баһылай Куприянов диэн, били Уйбаан Пинигин Тааттаҕа олорон эрчийэн таһаарбыт уолугар, билигин күүстээх маастар дуобатчыкка түбэспит. Оҕонньор көрөрө да, истэрэ да мөлтөх. Ол эрээри дуобатын түөрүйэтин умнубакка өйүгэр илдьэ сылдьар урааҥхай математик буоллаҕа! Сааһырдар да, чөл өйүн олох тута сылдьар.
Дьэ, сиэнин курдук маастары кытта иэмэх талах курдук эрийсибит уонна нуучча дуобатчыта П.Мазурок аатынан ааттаммыт «Мазурок сиэртибэтэ» диэн түөрүйэҕэ киллэрэн хаайбыт. Өссө киһититтэн «Бу “жертва Мазурка” диэн партияны билэҕин дуо?» диэн ыйыппыт. Киһитэ муннун анныгар «билэбин» диэбит эрээри, сатаан көмүскэммэккэ, 86 саастаах оҕонньорго кыайтарбыт. Оҕонньор кыайан, 2 очкону сурунан, харыс үрдээбит.
Дуобатчыттар били кулууптарыгар кэлэн ортоку эрэ таһымҥа сылдьыбыт оҕонньордоро улахан күрэхтэһиигэ маастары кыайбытыгар соһуйуу бөҕөтүн соһуйбуттар. Тута «чыычый» киһи буолбут. Көр, Мазурок албаһа ытык кырдьаҕаска ити курдук туһалаабыт.
Эрийсиилээх В.Карпов турнира түмүктэммит, үөрүүнү-көтүүнү, хомолтону да аҕалбыта чахчы. Оттон мин ити турниры барытын сырдаппакка, кырдьыбат өй күүһүн туһунан кэпсээтим. Дуобат мэйиини эрчийэн, киһи үйэтин уһатар үтүө холобура бу сылдьар дии саныыбын.
Федот Харитонов. Мэҥэ Хаҥалас.
