Москубаҕа ВДНХ-ҕа Арассыыйатааҕы “Билии” уопсастыба түһүлгэтигэр “Азия Оҕолоро” норуоттар икки ардыларынааҕы VIII оонньуу мэтээллэрин сүрэхтээтилэр.
Мэтээллэри сахалыы тыыннаан, кыталык кынатын ойуутугар дьүөрэлээн оҥорбуттар. Кыталык – чэпчэки, кырдьыксыт уонна ымсыыта суох буолуу бэлиэтэ. Мэтээл ортотугар сэргэ омооно дьүһүйүллүбүт. Кини киһини куһаҕан тыынтан харыстыыр, ыалдьытамсах уонна этэҥҥэ буолууну туоһулуур. Итини таһынан, сэргэ дьиэ иннигэр анньылларынан, бу дьиэ иччилээҕин (хаһаайын) көрдөрөр. Судургутук эттэххэ, Оонньууны Дьокуускай куорат ыытара көстөр.
Мэтээл кэтэх өттүгэр “Азия Оҕолоро” норуоттар икки ардыларынааҕы кэмитиэтин им бэлиэтэ ойууламмыт. Ол норуоттар икки ардыларынааҕы бииргэ үлэлэһиини уонна доҕордоһууну туоһулуур.
Бэлиэтээн эттэххэ, быйылгы Оонньууларга успуорт 24 көрүҥэр барыта 239 мэтээл кэмпилиэгэ оонньонуоҕа.
Sportyakutia.ru матырыйаала.
