Белоруссия легионера, биһиги уолбут Арыйаан Тютрин Белоруссияттан Парижка барыахтаах спортсменнар бастакы испииһэктэригэр киирбэтэх. Бэс ыйын 15 күнүгэр Олимпиада норуоттар икки ардыларынааҕы кэмитиэтэ (МОК) Олимпиадаҕа нейтральнай статустаах кыттар Арассыыйа уонна Белоруссия спортсменнарын испииһэгин таһаарбыт.
Тютрин Олимпиадаҕы кыттар лиссиэнсийэни быйыл Баку куоракка ылбыта. Ол үрдүнэн кини аата тоҕо эрэ испииһэккэ киирбэтэх. МОК саайтыгар сурулларынан, испииһэк анал хамыыһыйа быһаарыытынан, кэмиттэн-кэмигэр саҥардыллан иһиэхтээх. Уолбут онно киириэ диэн эрэнэбит.
МОК хамыыһыйатын ирдэбилин быһыытынан, Арассыыйаттан уонна Белоруссияттан Олимпиадаҕа нейтральнай статустаах кыттар спортсменнар анал байыаннай дьайыыны өйөөбөт, аармыйаҕа уонна анал сулууспаларга, ол иһигэр “Динамо” уонна ЦСКА успуорт кулууптарыгар, кыттыгаһа суох буолуохтаахтар.
Биллэрин курдук, быйыл Саха сириттэн Олимпиада путевкаларын хаһааҥҥытааҕар даҕаны элбэх киһи – 5 спортсмен – ылбыта. Ол иһигэр: Айаал Лазарев (Кыргыстаан), Виктор Рассадин (Таджикистан), Арыйаан Тютрин (Белоруссия), Георгий Окороков (Австралия) уонна Сардаана Трофимова (Кыргыстаан).
Олимпиада от ыйын 26 күнүттэн атырдьах ыйын 11 күнүгэр диэри Париж куоракка буолуохтаах.
