САХА ӨРӨСПҮҮБҮЛҮКЭТЭ “АЗИЯ ОҔОЛОРО” НОРУОТТАР ИККИ АРДЫЛАРЫНААҔЫ УСПУОРТ ООННЬУУТУН ТЭРИЙЭР БУОЛАН, ИККИ ХАМААНДАНАН КЫТТАР
Бастакы хамаандаҕа сүүмэрдээһини 245 спортсмен ааспыт. Иккискэ – 125 оҕо.
“Саха-1” хамаанда успуорт бары – 24 көрүҥэр – кыттыаҕа. Тириэньэрдэр ыччаттары успуорт үгэс буолбут эрэ көрүҥнэригэр буолбакка, алыш, кураж курдук тустууларга, Го оонньууга, хайаҕа ыттыыга кытта бэлэмнээбиттэр. Санаттахха, ити көрүҥнэр биһиэхэ саҥа сайдан эрэллэр.
СӨ сүүмэрдэммит хамаандатын биир салайааччыта Александр Андреев бэлиэтээбитинэн, спортсменнары хас даҕаны түһүмэҕинэн сүүмэрдээбиттэр: сүүмэрдиир тэрээһиннэр, айаннаах күрэхтэһиилэр, үөрэтэр-эрчийэр дьарыктар. Хамаандаҕа өрөспүүбүлүкэ бары кэриэтэ улууһун оҕолоро киирбиттэр.
“Владивостокка буолбут ааспыт Оонньууларга Саха сирин хамаандата отуттан тахса мэтээли аҕалбыта. Быйыл дьиэбитигэр буолар тэрээһиҥҥэ 50-тан тахса мэтээли ылар соруктаахпыт. Ордук тустууктарбытыгар, боксердарбытыгар, чэпчэки атлетиканан дьарыктанааччыларбытыгар, охчуттарбытыгар, “пулевиктарбытыгар” уонна “стендевиктэрбитигэр”, волейболистарбытыгар, футболистарбытыгар, баскетболистарбытыгар уо.д.а. эрэнэбит. Национальнай көрүҥнэрбитин көмүскүүр спортсменнарбытыттан эмиэ үрдүк көрдөрүүнү эрэйэбит: хапсаҕайтан, мас тардыһыытыттан, ыстаҥаттан. Ол да буоллар, оҕолорго аһара улахан эппиэтинэһи сүктэрэ, дьарыгынан, кыайыынан ыга-түүрэ сатаабаппыт. Биһиги хас биирдиилэригэр эрэнэбит”.
СӨ сүүмэрдэммит хамаандатын хамандыырынан Хаҥаластан төрүттээх тустуук, хапсаҕайдьыт Айхаан Кривошапкин талыллыбыта. Кини көҥүл тустууга өрөспүүбүлүкэ биирдиилээн бастыыр иһин күрэхтэһиитин кыайыылааҕа, Уһук Илин уонна Арассыыйа призера.
Sportyakutia.ru
