ООННЬУУ СҮРҮН БЭЛИЭТЭ – ӨСПӨТ УОТА – БАРЫ УЛУУСТАРЫ КЭРИЙЭН, БҮГҮН, БЭС ЫЙЫН 26 КҮНҮГЭР, ДЬОКУУСКАЙГА КЭЛЛЭ
“Азия оҕолорун” уотун эстэпиэтэтин түмүктүүр түһүмэҕэ Дьокуускайга саҕаланна. Эстэпиэтэ Кыайыы болуоссатыттан саҕаланан баран, киин куорат сүрүн уулуссаларынан айаннаан, Доҕордоһуу болуоссатыгар тиийэн түмүктэниэҕэ. Онно барыта 80 киһи кыттар, ол иһигэр Ил Дархан Айсен Николаев.
“100 күн анараа өттүгэр Өлүөнэ турууктарын тэллэҕэр умайбыт уот барыта 37 тыһыынча килэмиэтири айаннаан, бары улуустарга сылдьан, дьон тапталын, доҕордуу сыһыаны иҥэринэн, “Азия оҕолоро” оонньууга үтүөнү уонна ситиһиини баҕарар санаалары түмэн, бүгүн Дьокуускайга кэллэ”, – диэн Ил Дархан анаан бэлиэтээтэ.
“Азия оҕолоро” оонньуу норуоттар икки ардыларынааҕы кэмитиэтин бэрэсидьиэнэ Владимир Максимов Оонньуу арыллара бэрт кыра кэм хаалбытын санатта.
“Бүгүн биһиги “Туймаада” стадиоҥҥа “Азия оҕолоро” норуоттар икки ардыларынааҕы ахсыс оонньуу арыллыытын туоһулара буолуохпут. Бука барыгытыгар бу Оонньуу үгэс курдук этэҥҥэ ааһарыгар, күүстээхтэр кыайылларыгар баҕарабын”, – диэтэ Владимир Максимов.
“Олимпиада хамсааһына диэн, бастатан туран, Олимпиада сыаннастара буолаллар. Ол аата – доҕордоһуу, утарсааччыга ытыктабыллаах сыһыан уонна уһуллуччу, дэгиттэр буоларга дьулуһуу. Мин “Азия оҕолоро” оонньуу бары кыттааччылара ити ирдэбиллэргэ толору эппиэттииллэр диэн эрэнэбин”, – диэн РФ Олимпиада кэмитиэтин бэрэсидьиэнэ Станислав Поздняков эҕэрдэлээтэ.
Бэй.кэр.
Хаартыска: Андрей Сорокин, СИА.