Балаҕан ыйын 8 – 13 күннэригэр Казахстан киин куоратыгар Астанаҕа V Аан дойдутааҕы Көс омуктар оонньуулара (Всемирные Игры кочевников) ыытыллар. Манна 89 дойдуттан 2500 тахса киһи кытта сылдьар. Олор истэригэр биир дойдулаахпыт, биллиилээх сылгыһыт, айанньыт Дугуйдан Винокуров баар. Кини Татарстан хамаандатыгар киирэн норуоттар икки ардыларынааҕы «Улы дала жорыгы» (Тур Великой степи) хас да күннээх 500 км атынан сүүрдүүгэ кытынна. Ол туһунан «Спорт Якутии» саайт эрэдээктэригэр Александр Посельскайга кэпсээтэ.
— Атын аттарынан кыттыбыт буоламмын, сүрдээҕин ыарырҕаттым. Ол да буоллар, эһиилги оонньууларга бэйэм сылгыларбынан кыттар санаалаах бу тургутууну эппинэн-хааммынан үчүгйдик билэн туораатым.
Күн ахсын 100 км ааһан, биэс күн устата 500 км бардыбыт. Татарстан хамаандатын биэс атыттан биир эрэ ат биэтэккэ тиийдэ. Сылгы атаҕынан кыаммат буоларын бастакыбын көрдүм. Холобура, Иран, Турция, Венгрия, Кыргызстан, ЮАР, Арассыыйа 17 хамаандатын уонна атын судаарыстыбалар аттара бары атахтарыгар уонна бүөрдэригэр кыһалҕалаахтар. Бу наһаа түргэнник сүүрэллэриттэн эбит. Биһиги сылгыбыт, төһө да итилэр курдук түргэнник сүүрбэтэр, биэтэккэ тиийиэ этэ дии саныыбын.
Айан суола олус киэҥ, сөҕүмэр этэ. Биһиги Ботай оройуонун Лобаново дэриэбинэтиттэн Астанаҕа диэри истиэби туораан уонна айан суолунан барбыппыт. Иккис, үһүс күммүт ордук күүрээннээх этэ. Жокейдар аттарын хара күүстэринэн, хаһан охтуор диэри кымньыылаан, сүүрдүбүттэрэ. Ону таһынан, аттарыгар систиэмэ туруораллар, битэмиин укуоллууллар.
Миигин Тыа хаһаайыстыбатын министиэристибэтэ сорудахтаан ыыппыта. Өрөспүүбүлүкэҕэ ат успуордун сайыннарыыга туһулаан барытын иһиттэн үөрэтэн, тириэньэрдэри кытта кэпсэтэн, видеоҕа уһулан кэлиэхтээх этим. Чуолаан, атынан киирсиини, ат үрдүттэн оҕунан ытыыны.
Дугуйдан Винокуров өрөспүүбүлүкэтээҕи хапсаҕай күрэхтэригэр ситиһиилээхтик кыттарын, Татарстаҥҥа ыытыллыбыт норуоттар икки ардыларынааҕы турнирга атынан киирсиигэ үһүс миэстэ, ат үрдүттэн оҕунан ытыыга бастакы миэстэ буолбутун санатабыт. Кини этэринэн, ити көрүҥнэр биһиэхэ сахаларга хааммытыгар бааллар, онон эдэр дьоҥҥо олус барсаллар.
Сонун төрдө: Спорт Якутии
Хаартыска: https://golos-naroda.kz
