Алтынньы 13 күнүгэр киэһэ 17:00 чаастан СТС ханаалга «Суперниндзя» шоу аан дойдутааҕы түһүмэҕин премьерата буолуоҕа. Манна бырайыак устуоруйатыгар аан бастакытын саха спортсмена Павел Пестряков кыттыаҕа.
«Биһиэхэ ниндзя-успуорт көрүҥэ олох сайдыбакка турар. Оттон мин биир сыл анараа өттүгэр сөбүлээн дьарыктанан барбытым. Билигин бу көрүҥ элэмиэннэрин мин эрэ оҥоробун. Онон, соҕотоҕун Саха сирин аатын көмүскүү сылдьарым олус эппиэтинэстээх уонна долгутуулаах. Ол да буоллар, күрэхтэһэргэ бэлэммин. Кэнники ыйдарга турниктарга, ол иннинэ скалодромҥа дьарыктаммытым. Бачча улахан таһымнаах күрэхтэһиигэ биирдэ да кытта иликпин.Саха сириттэн ырааппатаҕым. Уонна тута аан дойдутааҕы таһымҥа тиийэн хааллым», - диэн кини долгуйуутун үллэһиннэ.
Павелы кытта шоуга Арассыыйа спортсменнарын сэргэ Франция, Германия, Швейцария, Австрия, АХШ, Мексика, Коста-Рика, Оман уонна да атын дойду атлеттара күрэхтэһиэхтэрэ. «Суперниндзяны» уһулуу Минеральнай Ууларга 40 000 кв.м. иэннээх сиргэ 112 м уһуннаах моһоллордоох балаһаҕа барда. Бастакы сезон кыайыылааҕа, трассаны толкуйдааччы Юрий Прокудин уруккутааҕар төһө эмэ уустук тургутууну толкуйдаабытын бэлиэтиир.
Сонун төрдө: https://yakutia24.ru
