Киир

Киир

Аҕа дойду көмүскэлигэр анал байыаннай дьайыыга хорсун боотурдуу охтубут СӨ үөрэҕириитин, СӨ физическэй култууратын уонна успуордун туйгуна, “Эр санаа” уордьан кавалера, Азия оҕолорун бастакы оонньууларын буоксаҕа чөмпүйүөнэ Потапов Станислав Семенович кэриэһигэр кыра уонна улахан саастаах уолаттар ортолоругар өрөспүүбүлүкэтээҕи аһаҕас турнир ахсынньы 17-19 күннэригэр Дьокуускай куоракка олимпийскай чөмпүйүөн Р.М. Дмитриев аатынан Олимпийскай эрэллэри иитэр училищеҕа буокса үрдүк таһымнаахтык ыытылынна.

Станислав сырдык мөссүөнэ үөрэммит уонна сүрүн тириэньэринэн үлэлээбит училищетын эркинигэр өйдөбүнньүк дуоскаҕа үйэтитилиннэ. Ким да умнуллубат, туох да умнуллубат. Өйдөбүнньүгү арыйыыга Ил Түмэн дьокутааттара В.М. Прокопьев, Г.Р. Балакшин, СӨ физическэй култууратын уонна успуордун миниистирэ Л.Н. Спиридонов, Ньурба улууһун баһылыга А.М. Иннокентьев, училище дириэктэрэ С.С. Чердонов, Станислав аҕата С.А. Потапов, Станислав кэргэнэ Е.Г. Потапова, уола Марсен тыл эттилэр, иһирэх ахтыы оҥордулар.

Бу күрэхтэһии Ньурба улууһа тэриллибитэ 200 сылын бэлиэтиир “Ньурба күннэрэ” тэрээһини кытта дьүөрэлэһиннэрэ ыытыллыбыта дьон биһирэбилин ылла, кэрэхсэттэ. Кырдьык, Станислав төрөөбүт Ньурбатын патриота этэ, ону кини үлэтинэн-хамнаһынан, дьиҥ олоҕунан көрдөрбүтэ. Маннык күрэхтэһиилэр уол оҕону күүс-уох, өй-санаа, төрөөбүт дойдуга бэриниилээх буолуу холобурдарыгар иитиигэ олус улахан суолталаахтар.

WhatsApp Image 2024 12 22 at 23.09.27

Бу күрэхтэһиигэ тус бэйэтигэр эрэллээх, тулуурдаах, дьулуурдаах, дойдутугар, дьонугар-сэргэтигэр үрдүк эппиэтинэстээх спортсмен кыайда уонна дьиэтигэр-уотугар кыайыы кынаттанан, түөһүгэр мэтээл иилинэн, илиитигэр сыаналаах бириис тутан үөрдэ-көттө. Станислав Семенович иитиллээччитэ Арассыыйа успуордун буоксаҕа маастара Михаил Хатылыков, Сэбиэскэй Сойуус уолаттарга буоксаҕа күрэхтэһиитин икки төгүллээх призера Аян Иванов иитиллээччилэрэ кыахтаахтык кииристилэр. Ньурба улууһа тэриллибитэ 200 сылыгар аналлаах “Ньурба күннэрэ” үөрүүлээх бырааһынньыгы киэргэттилэр, дойдуларын дорҕоонноохтук ааттатан дьонноругар-сэргэлэригэр үчүгэй бэлэҕи оҥордулар.

WhatsApp Image 2024 12 22 at 22.51.44

Күрэхтэһиигэ 167 спортсмен кытынна. Буокса тириэньэрдэрэ сөптөөх тосхолу тутуһан иитии, уһуйуу ньымаларыгар саҥа сүүрээни киллэрбиттэрэ иитиллээччилэрин ситиһиилэригэр көһүннэ. Олимпийскай эрэллэри иитэр училище иитиллээччилэрэ, Дьокуускай, Мэҥэ Хаҥалас, Ньурба, Уус Алдан, Чурапчы, Өлүөхүмэ, Нам, Нерюнгри боксердара рингэҕэ ордук тахсыылаахтык кииристилэр, тулуурдарын, дьулуурдарын көрдөрөн инники күөҥҥэ таҕыстылар, анал сыаналаах бириистэринэн бэлиэтэннилэр.

WhatsApp Image 2024 12 22 at 22.47.56

Ыччат миниистирин эбээһинэһин толорооччу, Арассыыйа Дьоруойа И.В.Юргин Станислав аҕатыгар С.А.Потаповка ыччаты иитиигэ кылаатын иһин Махтал сурук туттарда, ыччаттарга туһаайан кэлэр кэмҥэ сыалы-соругу чопчулаата, кэлэн иһэр Саҥа Дьылынан эҕэрдэлээтэ, ситиһиилэри баҕарда.

WhatsApp Image 2024 12 22 at 22.49.10

Патриоттуу иитиигэ улахан суолталаах бу тэрээһиҥҥэ үтүө көмөлөрүн иһин СӨ успуордун миниистиригэр Л.Н.Спиридоновка, Ил Түмэн дьокутааттарыгар Г.Р. Балакшиҥҥа, В.М. Прокопьевка, Олимпийскай эрэллэри иитэр училище кэлэктиибигэр, дириэктэр С.С.Чердоновка, Ньурба улууһун баһылыгар А.М. Иннокентьевка, Октябрьскай нэһилиэк баһылыгар С.А. Корякиҥҥа, успуорт кэмитиэтин салайааччытыгар Р.А. Алексеевка, улуус салалтатын үлэһитигэр М.М. Паҥҥа, Зоя Васильевна уонна Герман Серафимович Титовтарга, Вера Ивановна, А.А. Васильевтарга, А.Е. Васильевка, В.Р. Арбугиҥҥа, А.Б. Тарасовка, С.Ю. Федоровка, А.В. Брагиҥҥа, К.О. Бияковка, Д.И. Ивановка, Г.Н. Теряновка, А.Н. Григорьевка, П.В. Потаповка, П.Е. Степановка, И.В. Егоровка Потаповтар аймах аатыттан ис сүрэхтэн сиртэн халлааҥҥа диэри махтанабыт, ким да умнуллубат, туох да умнуллубат.

РФ үөрэҕириитин туйгуна,
СӨ үөрэҕириитин үтүөлээх үлэһитэ,
Учууталлар учууталлара,
СӨ үөрэҕириитин тиһигин бочуоттаах бэтэрээнэ,
Ньурба улууһун Бочуоттаах киһитэ
Сэмэн Акыымабыс Батаакап.
Дьокуускай к.

Санааҕын суруй

Бүтэһик сонуннар