Тохсунньу 11-12 күнүгэр ыытыллыбыт VI-с «Тымныы полюһа - Өймөкөөн» экстремальнай марафоҥҥа Саха сирин 13 улууһуттан уонна Арассыыйа 16 эрэгийиэниттэн 18-тан 70 диэри саастаах 50 успуордунан дьарыктанааччы кытынна.
Күрэхтэһии бастакы күнүгэр бастыҥнар ахсааннарыгар киирбиттэрэ: 5 км - Полина Слободчикова (Сунтаар), 10 км - Алексей Кузько (Дьокуускай), 15 км - Эдуард Ксенофонтов (Хатас) уонна 21,1км – Алексей Герасимов (Дьокуускай).

42,2 км уһуну бастакынан Хаҥалас улууһуттан Леонид Зыков туораата. Кини ЫБММ үлэһитэ, , хайыһарынан сүүрүүгэ,чэпчэки атлетикаҕа, мини-путбуолга өрөспүүбүлүкэ хас да төгүллээх призера уонна чөмпүйүөнэ, «Тымныы полюһа - Өймөкөөн» марафон полумарафонун икки төгүллээх абсолютнай чөмпүйүөнэ.
Быйылгы марафон Аҕа дойду Улуу сэриитигэр кыайыы 80 сылыгар, Арассыыйаҕа Аҕа дойдуну, Саха сиригэр Ийэ дойдуну көмүскээччи сылыгар ананна. Ол иһин кыттааччылар бэтэрээн аймахтарын мэтириэттэрин түөстэригэр иилинэн сүүрдүлэр.
Сонун төрдө: СӨ Бырабыыталыстыбатын уонна Ил Дарханын пресс-сулууспата