Киир

Киир

Бу субуотаттан, олунньу 1 күнүттэн, “Өрөгөй” успуорт киинигэр норуоттар икки ардыларынааҕы таһымнаммыт “Хаҥалас хапсаҕайа” саҕаланар.

Дьиҥэр, бу күрэхтэһии хаһан эрэ Хаҥалас улууһугар төрүттэммитэ эрээри, быйылгыттан ыыра кэҥээн, бу буолаары турар күрэхтэһиигэ аан дойду тустуутун сулустара кэлиэхтэрэ, барыта 400-тэн тахса спортсмен кыттыаҕа. Биириис пуондата – 6 000 000 солкуобай. Асболютнайга – 500 000 солкуобай! Онон өтөрүнэн маннык тэрээһин буолара күүтүллүбэт.

Эр дьоҥҥо бастаабыттарга – 100 000 солк., иккистээбиттэргэ – 70 000 солк., үһүстэргэ – 30 000 солк. Бэтэрээннэр 50, 25 уонна 15 тыһыынчалыыны илдьэ барыахтара. Бу күннэргэ киин куораппытыгар номнуо Алтаай, Тыва, Бүрээтийэ, Хакасия, Татарстан, Чувашия, Забайкалье кыраайын уонна Иркутскай уобалаһын бөҕөстөрө кэлэн сыталлар. Ону таһынан, күөн күрэскэ өссө Азербайджан, Беларусь, Иран, Индия, Кытай, Кыргыстаан, Узбекистан, Грузия уонна Монголия ааттаахтара баар буолуохтара.

“Хаҥалас хапсаҕайа” быйыл аан бастакытын “норуоттар икки ардыларынааҕы” диэн таһымынан ыытыллар. Сүрүн судьуйанан Андрей Яковлев үлэлиэҕэ.

Үгэс курдук, маннык ыйааһыннар баар буолуохтара: эр дьоҥҥо – 57, 65, 75, 85, 95 кг уонна 95-тэн үөһээ: бэтэрээннэргэ – 60, 70, 80, 90 кг уонна онтон үөһээ.  

Бэй.кэр.
Хаартыска: Мария Васильева/СИА

Санааҕын суруй

Бүтэһик сонуннар