Саха сирин эдэр саахыматчыттара Арассыыйа күрэхтэһиитигэр үрдүк ситиһиилэннилэр: өрөспүүбүлүкэ устуоруйатыгар аан бастакынан Валерия Слепцова Үрдүкү лигаҕа классическай саахымакка кыһыл көмүс мэтээли, оттон Арина Васильева боруонса мэтээли аҕаллылар. Бу туһунан СӨ Саахымат бэдэрээссийэтин телеграм-ханаала иһитиннэрдэ.
Тохсунньу 27 күнүттэн олунньу 10 күнүгэр диэри Сочи куоракка саахыматчыттар саамай кэтэһэр, оҕолорго уонна ыччаттарга Арассыыйа күрэҕэ буолан ааста. Күрэхтэһии түөрт көрүҥҥэ ыытылынна: саахымат композицияларын быһаарыы, блиц, түргэн уонна классическай саахымат (бастакы уонна үрдүкү лигаларга). Саха сирин хамаандатыттан кыттыыны ыллылар: Валерия Слепцова (Д-15), Артур Васильев (Ю-17), Альберт Постников (Ю-19), Владислав Жирков (Ю-19), Арина Васильева (Д-19) и Полина Пак (Д-19) – үрдүкү лигаҕа, Александр Иванов (Ю-15), Давид Местников (Ю-17) - бастакы лигаҕа, салайааччы - СӨ хамаандатын ыстаарсай тириэньэрэ Роман Ганжуров.
СӨ хамаандата араас көрүҥҥэ барыта 4 мэтээли аҕалла, бу муҥутуур ситиһии буолар. Бу иннинэ Саха сиригэр маннык ситиһии кэлэ илигэ, онон рекорд олохтонно диэн этиэххэ сөп. Полина Пак түргэн саахымакка чөмпүйүөн буолла уонна саахымат композицияларын быһаарыыга боруонса мэтээли аҕалла. Классическай саахымакка Валерия Слепцова кыһыл көмүһү, оттон Арина Васильева боруонса мэтээли ыллылар.
Кыайыылаахтары уонна миэстэлэспиттэри эҕэрдэлиибит!
Татьяна Жанчикова
