“Тоҕус томтор оонньууларын” икки төгүллээх кыайыылааҕа, төрүт многоборье чулуута, Чурапчы улууһун боотура Байбал Друзьянов, “Дыгын оонньууларыгар” сүүмэрдиир иккис түһүмэххэ эчэйии ылан, салгыы кыайан кыттыбат буолла. Бу туһунан “Спорт Якутия” иһитиннэрэр.
Спортсмен Бороҕоҥҥо ыытыллыбыт күрэхтэһиигэ мас тардыһа сылдьан, өттүгүн быччыҥын иҥиирин быһан (полный разрыв сухожилия мышц бедра). Байбал этэҥҥэ эпэрээссийэлэммит эрээри, кини салгыы кыттар кыаҕа суох. Толору үтүөрэригэр уонна чөлүгэр түһэригэр бириэмэ уонна сынньалаҥ ирдэнэр.
Друзьянов күрэхтэһии финалыгар киирэр кыахтаах этэ, ол гынан баран эчэйииттэн сылтаан, 28-с миэстэнэн түмүктээтэ. Бу икки түһүмэх көрдөрүүтүнэн, кини 57-с миэстэттэн 18-с миэстэҕэ сылдьар этэ. “Өссө киирсиэхпит” диэн Байбал тус ситимигэр суруйбут.
Татьяна Жанчикова
