Биллиилээх спортсмен, UFC экс-байыаһа Григорий Попов, 3 сыл буолан баран, Владивостокка панкратион улахан турнирыгар кыттыаҕа. Турнир муус устар 26 чыыһылатыгар “Фетисов” аренаҕа ыытыллар. Бу туһунан “Спорт Якутии” ситим иһитиннэрдэ.
Күөн көрсүһүү 60 киилэлээх ыйааһыҥҥа ыытыллыаҕа. Григорий утарсааччыта, хотторуу хомолтотун билэ илик 25 саастаах Артем Бутко (4-0) Владивосток аатыттан киирсиэҕэ. Бэйэтэ Кэбээйи улууһун Сангаар бөһүөлэгиттэн төрүттээх. Кинини кытта бассаабынан кэпсэттибит:
«Билигин Москуба куоракка дьарыктана сылдьабын, тириэньэрим Евгений Ерохин. Тустар, охсор тиэхиньикэбин, күүспүн-уохпун, толкуйдуур ньымабын барытын чочуйа сатыыбын. Киирсии кэмигэр хайа баҕарар соһуччу түгэҥҥэ бэлэм буолуохпун баҕарабын», – диэн кини кытаанах санаалааҕын биллэрдэ.
Санатар буоллахха, Григорий Попов - MFP панкратиоҥҥа Азия чөмпүйүөнэ, тайскай боксаҕа Арассыыйа, Азия уонна аан дойду чөмпүйүөнэ. Кини UFC аан дойду сүрүн промоушеныгар иккитэ киирсибитэ. Григорий бүтэһигин 2022 сыллаахха Алматы куоракка ыытыллыбыт турнирга кыттыбыта. Сааһа – 40, рекорда –14-4.
Татьяна Жанчикова.
