Кулун тутар 16 күнүгэр Өлүөхүмэ куоратыгар Нордголд хампаанньа бирииһигэр уолаттарга көҥүл тустууга өрөспүүбүлүкэтээҕи турнир буолла.
Турнир ССРС, Арассыыйа успуордун маастардара А.В. Киселев, Н.И. Кульбертинов, В.В. Селляев, М.Н. Чердонов ааттарыгар уонна дойдубутугар Аҕа дойдуну көмүскээччи сылыгар ананан тэрилиннэ.
Күөн күрэстэһиигэ 13 сүүмэрдэммит хамаандаҕа 170 эдэр спортсмен кытынна. Кыттааччылар 11 улуустан уонна 2 куораттан – Дьокуускайтан, Ленскэйтэн – кэллилэр. Өлүөхүмэттэн бэйэтиттэн, нэһилиэктэриттэн эмиэ бааллар. Күрэхтэһии саастарынан уонна ыйааһыннарынан 25 түһүмэххэ араарыллан ыытылынна.
Турниры көҕүлээн тэрийээччи, ССРС успуордун маастара, норуот дьокутаата Николай Кульбертинов маннык кэпсиир:
– Нордголд хампаанньа бирииһигэр ыытыллыбыт турнир – биһиги оройуоммутугар успуорт чаҕылхай бырааһынньыга. Көҥүл тустууга маннык таһымнаах күрэхтэһии, буолаары буолан, уолаттарга, Өлүөхүмэҕэ ыытыллыбатаҕа ыраатта. Оройуоммут эрэ буолбакка, өрөспүүбүлүкэ оҕолоругар барыларыгар дьоһун бэлэх буолла.
Эдэр спортсменнары, тириэньэрдэри, төрөппүттэри холбоон туран турнирга 250-тэн тахса ыалдьыт кэллэ. А.Н. Платонов аатынан Оҕо успуорт оскуолатыгар – “Чароит” успуорт комплексыгар – күрэхтэстилэр.
– Турнир үтүө өйдөбүлү хаалларда. Өлүөхүмэҕэ Нордголд хампаанньа бирииһигэр уолаттарга турнир аан бастаан ыытылынна. Бу -- саха успуордугар дьоһун түгэн. Турнирга кыттыбыт уолаттар бары кыайыылаахтар, бары чөмпүйүөннэр! Тоҕо диэтэххэ, успуорт илин-кэлин түсүһүүлээх биир көрүҥэр – көҥүл тустууга – ылсан дьарыктаналлар. Нордголд хампаанньаҕа барҕа махтал буоллун! – диэн турнир бочуоттаах ыалдьыта, Монреаль куоракка 1976 с. ыытыллыбыт Олимпийскай оонньуу кыайыылааҕа, аан дойду үс төгүллээх чөмпүйүөнэ, Дьобуруопа чөмпүйүөнэ, ССРС успуордун үтүөлээх маастара, РФ физическэй култууратын үтүөлээх үлэһитэ, норуот дьокутаата Павел Пинигин санаатын үллэһиннэ.
Чөмпүйүөн аатын сүкпүт, бириистээх миэстэни ылбыт эдэр спортсменнар генеральнай успуонсар Нордголд хампаанньаттан, ону сэргэ атын усупонсардартан мэтээллэринэн, кырааматаларынан уонна сыаналаах бириистэринэн наҕараадаланнылар. Турнир хаһаайыннара – Өлүөхүмэ спортсменнара – 8 кыһыл көмүс мэтээли ыллылар!
Нордголд хампаанньа Арассыыйаҕа, Казахстаҥҥа бырайыактарын управлениетын салайааччы Александр Бурмистров уолаттарга көҥүл тустуу өрөспүүбүлүкэтээҕи турнира 2026 сылга Өлүөхүмэ куоратыгар эмиэ ыытылларын туһунан иһитиннэрдэ.
Кыайыылаахтары барыларын эҕэрдэлиибит!
Нордголд хампаанньа пресс-сулууспата.
