«Муус устар» бэстибээл успуорт өттүгэр биир ыалдьыта – уус-уран гимнастикаҕа аан дойдутааҕы успуорт маастара, Европа, аан дойду үс төгүллээх боруонса призера, үс олимпиада кыттыылааҕа Екатерина Веденеева.
Кини ыыппыт икки маастар-кылааһыгар өрөспүүбүлүкэ араас кулуубуттан, успуорт оскуолатыттан 192 оҕо сырытта. Екатерина Веденеева Саха сиригэр сырыытын туһунан санаатын маннык үллэһиннэ:
"Бу икки күн мин өйбөр-санаабар өр кэмҥэ хаалыа. Дьоҥҥут эйэҕэһэ-истиҥэ, тэрээһин чуолкайа, дьарыктаммыт оҕолор баҕалара, дьоҕурдара ордук харахха быраҕыллар. Дьарыктанар усулуобуйаҕыт уһулуччу үчүгэй эбит диэн сыаналаатым: 9 №-дээх Оҕо успуордун оскуолатыгар (ДЮСШ) курдук саала Сибиир уонна Уһук Илин өттүгэр Омскайга эрэ баара буолуо.
Миигин истиҥник көрсүбүт, тэрийбит дьоҥҥо, чуолаан уус-уран гимнастика тириэньэрдэригэр уонна кырачаан гимнасткаларга эмиэ истиҥ махталбын ыытабын. Үүнүҥ-сайдыҥ, элбэх ситиһиини, кыайыыны баҕарабын!"
