Бэҕэһээ, кулун тутар 30 күнүгэр, Дьокуускайга XXII «Манчаары оонньуулара» төрүт күрэс спартакиадатыгар диэри 100 күн хаалбытын үөрүүлээхтик ааҕыы саҕаланна. Онон сибээстээн, бырабыыталыстыба бэрэссэдээтэлин солбуйааччы Сергей Местников Таатта улууһугар бэлэмнэнии хайдах бара турарын иһитиннэрдэ.
Ытык Күөл сэлиэнньэтигэр спартакиада эбийиэктэрин тутуу уонна кэлбит дьону олордор усулуобуйаны тэрийии түмүктэнэн эрэр. Улуус киинигэр сүүрэр дорожкалаах элбэх хайысхалаах чэбдигирдэр-күрэстэһэр уораҕайы, ипподром, Боробул сэлиэнньэтигэр аһаҕас тииптээх физкультуралыыр-чэбдигирдэр уораҕайы, Чөркөөх сэлиэнньэтигэр күрэс саалатын арыйыахтара.
Спартакиадаҕа бэлэмнэнии иитинэн улуус киинигэр 100 оҕону олордор интэринээттээх 450 миэстэлээх оскуола тутулунна. Ытык Күөл сэлиэнньэтигэр 1000 миэстэлээх, трибуналаах саҥа стадион тутуута бүтэн эрэр. Манна сүрүн тэрээһиннэр уонна күрэстэһиилэр буолуохтара. Ил Дархан Айсен Николаев Таатта улууһугар оонньуулары ыытыы туһунан Ыйааҕа тахсыаҕыттан түөрт сыл устата элбэх үлэ ыытылынна.
Оонньууларга диэри хас күн хаалбытын ааҕыы үөрүүлээх тэрээһинигэр спартакиада ымыытын уонна өрөгөй ырыатын, успуорт саҥа тиэрминнэрин биһирэмэ, сувенир бородууксуйатын быыстапката, күрэс төрүт көрүҥнэригэр маастар-кылаастар ыытылыннылар.
Сонун төрдө: CӨ Бырабыыталыстыбатын уонна Ил Дарханын пресс-сулууспата
