Бу нэдиэлэ сүбэ күнүгэр (муус устар 26 күнүгэр) Хатаска мас тардыһыыга күрэхтэһии ыытыллаары турар. Тэрийээччи – Дьокуускай куорат успуорка управлениета. Оттон идиэйэ саҕааччы – успуорт эйгэтигэр биллэр-көстөр киһи Петр Наумов (экстремал-сүүрүк Петр Наумовы кытта бутуйумаҥ). Кини бу сайын 79 сааһын туолуохтаах. Ол да буоллар хары баттаһыытыгар (армрестлинг) уонна мас тардыһыытыгар дьарыктанарын, күрэхтэһиилэргэ кыттарын тохтото илик.
– Мас тардыһыыта – ытык оонньуубут, култуурабыт, бөлүһүөпүйэбит, – диир кини. – Өбүгэлэрбит иҥнэҥнээн, түөрэҥэлээн, утарылаһааччыларын суулларан эҥин тардыспаттара. Көбүс-көнөтүк олорон тардыһан хачыгыраталлара. Өбүгэлэрбит итинник күрэхтэһэн хара күүстээх киһини быһаараллара. Саха көнө сүрүннээх омук. Ити мас тардыһыыбытыгар ырылыччы көстөр. Ити төрүт көрүҥмүт дьүһүн кубулуйбута 33 сыл буолла. Нууччалаатахха “зрелищнайа” суох диэн ааттаан уларытыылары-тэлэритиилэри киллэрбиттэрэ. Ахсынньыга мин быраабылабынан үөһэ кылаас оҕолоругар күрэхтэһии ыытыллыбыта. Дьокуускай куорат Успуорка управлениетын тэрийиитинэн.
Аны билигин улахан дьоҥҥо күрэхтэһии тэрийэн эрэбит. Эмиэ Дьокуускай куорат успуорка управлениетын быһаччы кыттыытынан. Ол күрэхтэһиибит бу нэдиэлэ сүбэ күнүгэр (муус устар 26 күнүгэр) Хатас сэлиэнньэтин Ойуунускай уулуссатыгар турар саҥа успуорт комплексыгар ыытыллаары турар. Сарсыарда 9 чаастан мандаат хамыыһыйата үлэлээбитинэн барыаҕа. Тута ыйааһыннааһыны, сэрэбиэйи ыытыахпыт. Күрэхтэһии сүрүн судьуйата – Аркадий Аммосов. Мадьынылар биэс ыйааһыҥҥа күрэхтэһиэхтэрэ (65 кг, 75 кг, 85 кг, 100 кг уонна 100 кг үөһэ). Лоп курдук күнүс 12 чаастан күрэхтэһиини саҕалыахпыт. 16 чааска бириистээх миэстэлэр иһин быһаарыылаах хапсыһыылар (финаллар).
– Мадьынылар саҥа быраабыланан күрэхтэһэллэр дуо?
– Хас эмэ үйэни уҥуордаан кэлбит төрүт көрүҥмүтүгэр “саҥа быраабыла” диэн этии барсыбат курдук. Биллэн турар, ити билигин тэнийбит күрэхтэһии (мас-рестлинг) быраабылатынан буолбатах. Саҥа быраабылам сүнньэ туохха сытарый? Бастатан туран, тэбинэр мас уһуна биир эрэ миэтэрэ. Аны туран тэбинэр мас халыҥ буолбатах, чараас. Судьуйа үрдүттэн көрөн турар, манна тэбинэр маспыт “кыраныысса” курдук. Тардыһар маһыҥ “кыраныыссаны” сэнтимиэтир да аҥаара “кэспит”, утарылаһыыччыҥ өттүгэр барбыт буоллаҕына – кыайтараҕын. Саҥа быраабылам сүнньэ, дьэ, итиннэ сытар.
