Сэтинньи 15-16 күннэригэр Дьокуускайга Саха АССР, РСФСР уонна ССРС үтүөлээх тириэньэрэ Дмитрий Коркин кэриэһигэр ыытыллар Көҥүл тустууга норуоттар икки ардыларынааҕы XVI күрэхтэһии ситиһиилээхтик буолан ааста. Уон биир омук дойдутуттан уонна Арассыыйа эрэгийиэннэриттэн хас даҕаны хамаанда кытынна. Саха бөҕөстөрө быйылгы турнирга хаһааҥҥытааҕар даҕаны элбэх мэтээли ыллылар – уон биири.
АЛРОСА бу успуорт улахан тэрээһинин сүрүн партнера буолла
Быйылгы турнирга Австралияттан, Азербайджантан, Белоруссияттан, Кубаттан, Кыргызстантан, Хотугу Македонияттан, Молдоваттан, Монголияттан, Таджикистантан, Соҕурууҥҥу Кэриэйэттэн, Японияттан уонна Арассыыйа эрэгийиэннэриттэн барыта 200-тэн тахса тустуук муһунна.
Номоххо киирбит саха тириэньэрэ Дмитрий Коркин кэриэһигэр ыытыллар норуоттар икки ардыларынааҕы күрэхтэһии Арассыыйа эрэ буолбакка, үгүс атын дойду көҥүл тустууну таптааччыларын болҕомтотун эмиэ тардар.
“Дмитрий Коркин турнирын норуоттар икки ардыларынааҕы устуоруйата 2008 сыллаахтан саҕаламмыта. АЛРОСА генеральнай партнер быһыытынан кыттыбыта ыраатта. Быйыл хампаанньа Норуоттар икки ардыларынааҕы XVI күрэхтэһиигэ бириис пуондатыгар уонна тэрээһиҥҥэ диэн харчы көрбүтэ. Бэлиэтээн эттэххэ, АЛРОСА өрөспүүбүлүкэҕэ да, Арассыыйаҕа даҕаны успуорду уонна чөл олоҕу өйүүрэ – хампаанньа биир үтүө үгэһэ. Ити эйгэҕэ биһиги элбэх тэрээһини өйүүбүт”, – диэн АЛРОСА Саха сиригэр былаас судаарыстыбаннай уорганнарын кытта үлэҕэ отделын салайааччыта Ладимир Аргунов кэпсээтэ.
Успуорт улахан күрэхтэһиитэ үрдүк таһымнаахтык буолан ааста. Ону турнирга ыҥырыылаах ыалдьыт быһыытынан сылдьыбыт Олимпиада оонньууларын чөмпүйүөннэрэ эмиэ бэлиэтээтилэр. Тустуу буолар күннэригэр 3000 көрөөччүнү холкутук батарар “Өрөгөй” успуорт комплекса тобус-толору этэ. Биллэн турар, кинилэр уоттаах-төлөннөөх өйөбүллэрэ күрэхтэһээччилэргэ күүстэригэр күүс эптэ, ол да иһин биһиги спортсменнарбыт урукку өттүгэр ситиспэтэх ситиһиилэрин – уон биир мэтээли – ыллылар. Холобур, былырыыҥҥы турнирга биһиги бөҕөстөрбүт тоҕус наҕарааданы ылбыттара. 2023 сыллаахха – биэһи, 2022 сыллаахха – алтаны.
Тэрээһин арыллыытын дьоро түгэнигэр СӨ бырабыыталыстыбатын бэрэссэдээтэлин солбуйааччы Сергей Местников турнирга бу курдук элбэх судаарыстыба бэрэстэбиитэлэ кэлэн кыттарын норуоттар икки ардыларынааҕы күрэхтэһии таһымын, аатын-суолун, престиһин туоһулуурун бэлиэтээтэ. Ону тэҥэ өрөспүүбүлүкэ бүддьүөтүн сүрүн тирэҕэ буолар АЛРОСА хампаанньа өйөбүлүн успуорт сайдыытыгар сүдү кылаат быһыытынан сыаналаата.
Сергей Местников этэринэн, АЛРОСА хампаанньа өрөспүүбүлүкэҕэ уонна улуустарга социальнай эбийиэктэри аҥаардас нолуоктан уонна дивидентэн киирэр эрэ харчынан буолбакка, Үүнэр көлүөнэ пуондатын нөҥүө көрөр тус сыаллаах көмөтүнэн эмиэ тутар уонна саҥардар. Ол курдук, баара-суоҕа кэлиҥҥи аҕыйах сыл иһигэр Дьокуускай куоракка Саахымат-дуобат өрөспүүбүлүкэтээҕи киинин дьиэтэ, Амма Бөтүҥэр адаптивнай успуорт көрүҥнэригэр аналлаах элбэх функциялаах успуорт саалата, Үөһээ Халыма Зырянкатыгар Култуура-успуорт комплекса, о.д.а. эбийиэк тутулунна. Быйыл хампаанньа табаһыттар өрөспүүбүлүкэтээҕи успуорка оонньууларын, Үөһээ Бүлүүгэ уонна Мииринэйгэ ыытыллыбыт ыһыахтар успуорка күрэхтэһиилэрин өйөөтө. Итини таһынан быйыл АЛРОСА Мииринэй куорат “Кимберлит” успуорт комплексыгар ыытыллыбыт Александр Федотов аатынан Буокса Бүтүн Арассыыйатааҕы турнирын үбүлээтэ. Турнир түмүгүнэн сэттэ саха боксера Арассыыйа чөмпүйэнээтигэр барар путевканы тутта. Быйыл сайын Таатта улууһун Ытык Күөлүгэр ыытыллыбыт “Манчаары оонньуулара” күрэс төрүт көрүҥнэрин спартакиадыгар алмаастаах хампаанньа ботуччу көмөлөстө.
Итилэри сэргэ АЛРОСА өйүүр биир улахан тэрээһинэ – “Азия оҕолоро” норуоттар икки ардыларынааҕы успуорт оонньуулара.
Дмитрий Коркин кэриэһигэр ыытыллар быйылгы турнирга тоҕус мэтээл кэмпилиэгэ оонньонно. 57 кг Лев Павлов, 74 кг Олег Фомин, 92 кг Ньургун Сергин, 125 кг Никита Софронов бастаатылар. Быйыл 70 кг ахсыс төгүлүн кыһыл көмүс мэтээли Таджикистан аатыттан тустар Виктор Рассадин ылла. Кинилэри сэргэ педьестал муҥутуур үктэлигэр Кемерово уобалаһыттан Дмитрий Куприн (79 кг) уонна Константин Пшеничников (97 кг) таҕыстылар. Эмиэ итиччэ көмүс мэтээли Япония хамаандата илдьэ барда. Күн тахсар дойдутуттан кылбар киирсиилэри Такара Суда (61 кг) уонна Рейджи Учида (65 кг) көрдөрдүлэр. Өссө биир кыһыл көмүс мэтээли Азербайджан бөҕөһө Али Цокаев (86 кг) иилиннэ.
Норуоттар икки ардыларынааҕы турнир быйылгы кыайыылаахтара 200 тыһыынча солкуобайынан наҕараадаланнылар. Үрүҥ көмүс призердар 100-түү тыһыынчаны туттулар. Оттон боруонсалар – 75-тии тыһыынчаны.
Тэрийээччилэр иһитин-нэрбиттэринэн, эһиилги Дмитрий Коркин турнира өссө үрдүк таһымнаахтык ыытыллыахтаах. Бэлиэтээн эттэххэ, 2026 сылга Саха сирэ саха тустууга оскуолатын уһуйуллааччылара Монреаллааҕы Олимпиадаҕа өрөгөйдөрүн 50 сылын бэлиэтиэҕэ. 1976 сыллааҕы Оонньууларга педьесталга Дмитрий Коркин иитиллээччилэрэ Павел Пинигин, Роман Дмитриев уонна Александр Иванов бииргэ тахсыбыттара.
“Саха ааттаах тириэньэрин кэриэһигэр тэриллибит быйылгы турнир дьон-сэргэ өйүгэр толору көрөөччүлээх трибунатынан, үрдүк таһымнаах тэрээһининэн, уон биир дойду уонна Арассыыйа эрэгийиэннэрин хамаандалара кыттыытынан өйдөнөн хаалыаҕа. Киирсиилэр олус тыҥааһыннаахтык аастылар. Оттон Саха сирин олохтоохторо – биир бастыҥ ыалдьааччылар. Кинилэр көҥүл тустуу ис нэмин билэллэр, олус таптыыллар уонна сыаналыыллар. Бу турнир дьиҥ-чахчы Саха сиригэр улахан бырааһынньык. Онон АЛРОСА бу курдук таһымнаах күрэхтэһиигэ партнер буолара үрдүк чиэс дэниэн сөп”, – диэн Ладимир Аргунов бэлиэтээтэ.
Успуорт сайдыыта – алмаастаах хампаанньа социальнай бэлиитикэтин биир тутаах хайысхата. Быйылгы турнир алмаас ырыынагар төһө даҕаны уустук кэм бүрүүкээн турдар, сааҥсыйалар харгыстааталлар, АЛРОСА бэйэлээтэр бэйэтин өрөспүүбүлүкэтигэр син биир көмөлөһөрүн, социальнай соругун (ол иһигэр успуорт эйгэтигэр) толорорун туоһулуур.
