Өрөспүүбүлүкэтээҕи саахымат уонна дуобат киинигэр Саха сирин Ил Дарханын саахымакка IV Кубогын үһүс түһүмэҕэ буолар, түргэн саахымакка (рапид) Арассыыйатааҕы күрэхтэһии түмүгэ таҕыста. Новосибирскай уобаластан сылдьар норуоттар икки ардыларынааҕы маастар Роман Кезин 11 кыаллар очкуоттан 8,5 очкуону хомуйан, күрэхтэһии кыайыылааҕа буолла.
Муус устар 3-4 күннэригэр буолбут турнирга Арассыыйа 12 эрэгийиэниттэн 104 кыттааччы, ол иһигэр алта норуоттар икки ардыларынааҕы гроссмейстер мустан күөн көрүстэ. Иккис миэстэни Вадим Звягинцев (Москва), оттон үһүс миэстэни Сергей Волков (Мордовия Өрөспүүбүлүкэтэ) ыллылар.
Кыайыылаах Роман Кезин Саха сирин Ил Дарханын Кубогыгар иккис төгүлүн кэлэн кыттар. Кини бу турнир күүстээх өттүлэринэн эрэ буолбакка, ураты атмосфератынан өйүгэр хаалбытын бэлиэтээтэ.
«Бу турниры олус сөбүлүүбүн, тэриллиитэ наһаа үчүгэй. Түмэл иһигэр, хартыыналар ортолоругар классиканы оонньуур олус интэриэһинэй, хайдах эрэ аптаах сиргэ олорор курдук сананаҕын. Манна күүстээх оонньооччулар мусталлара кыайарга даҕаны, мотивацияны үөскэтэр», — диэн үллэһиннэ Роман Кезин.
Ил Дархан Кубога өрөспүүбүлүкэҕэ саахымат түмсүүтүгэр 100 сылыгар ананар уонна Арассыыйатааҕы таһымнаах түөрт улахан турниры холбуур.
СӨ Саахымакка федерацията
Хаартыска: Анастасия Рыжикова («Мой спорт!»), Сардаана Кривошапкина
