Эт-сиин култууратынан уонна успуордунан Саха сирин нэһилиэнньэтин 64,8%-на дьарыктанар, оттон 2030 с. 70%-наах кирбиини куоһарыахтаах үһүбүт. Ол туһунан СӨ успуорка миниистирэ Леонид Спиридонов Ил Түмэҥҥэ буолбут төгүрүк остуолга сырдатта.
“Саха сиригэр эт-сиин култууратынан уонна успуордунан тиһигин (систематически) быспакка нэһилиэнньэ 64,8%-на дьарыктанар. Ити көрдөрүүнэн Саха сирэ Уһук Илиҥҥэ иккис, оттон Арассыыйаҕа 19-с миэстэҕэ сылдьар. Успуорт эбийиэгинэн хааччыллыыбыт 65,7%. Дьон успуордунан дьарыктанар усулуобуйанан астыныыта – 64%. 2007 сылтан 2025 сылга диэри барыта 60 успуорт эбийиэгэ тутулунна”, – диэн миниистир дакылааттаата.
Кини этэринэн, 2030 сылга өрөспүүбүлүкэ нэһилиэнньэтин 70%-на успуордунан тиһиктээхтик дьарыктанар буолуохтаах.
Дьону успуордунан дьарыктанарга көҕүлүүр былаанын 23 муниципальнай тэриллии толорбут. Бастыҥ көрдөрүүлээх улуустарга Горнай, Ньурба, Ленскэй, Нерюнгри уонна Нам киирбиттэр. Хотугу улуустар “хаалан иһээччилэр” кэккэлэригэр киирбиттэр.
Даҕатан эттэххэ, успуорт министиэристибэтин сыллааҕы халандаарыгар 600-чэ тэрээһин киирэ сылдьар. Онно сыллата 300-чэ тыһыынча киһи кыттар.
