Бу күннэргэ Кэбээйи дьоно-сэргэтэ Олоҥхо ыһыаҕын ыытаары, ыалдьыттары дьоһуннук көрсөөрү тэрээһин үлэтигэр-хамнаһыгар умса-төннө түһэр. Ыһыах от ыйын 3 күнүттэн саҕалаан 5 күнүгэр диэри Кэбээйи бөһүөлэгин таһыгар сытар Уһун Хонуу диэн сиргэ ыытыллыа. Тэрийээччилэр өрөспүүбүлүкэ араас муннугуттан барыта 8 тыһыынча кэриҥэ ыалдьыт уонна кыттааччы кэлэрин долгуйа кэтэһэллэр
Үгэс курдук, ыһыах бырагыраамата олус баай, күрэһэ-куонкуруһа бэрт элбэх, оттон успуордун күрэхтэһиилэрэ тыҥааһыннаах буолара күүтүллэр. “Спорт Якутии” саайт эһиги болҕомтоҕутугар 2026 сыллааҕы Олоҥхо ыһыаҕын спортивнай күрэхтэрин билиһиннэрэр.
Успуорт маннык төрүт көрүҥнэрэ баар буолуохтара:
– ЭР БЭРДЭ. Күүс-уох төрүт дэгит күрэһэ;
– АТАХ ООННЬУУТА. Эр дьоҥҥо уонна дьахталларга тус-туһунан кылыыга, ыстаҥаҕа уонна куобахха сэттэлии туоһу ойууга биирдиилээн бастыыр иһин күрэс;
– ХАПСАҔАЙ. 75 киилэҕэ диэри уонна онтон ыарахан ыйааһыннаах эр дьоҥҥо хапсаҕайга биирдиилээн бастыыр иһин күрэс;
– МАС ТАРДЫҺЫЫТА. 75 киилэҕэ диэри уонна онтон ыарахан ыйааһыннаах эр дьоҥҥо мас тардыһыытыгар биирдиилээн бастыыр иһин күрэс, дьахталларга – 75 киилэҕэ диэри.
– БАЙАНАЙ БЭЛЭҔЭ. Төрүт оҕунан ытыы күрэһэ;
– ДАЛЛА МЭНДЭЙИИ. Төрүт ох саалар оҥоһууларын көрүү, сыалы уонна ырааҕы ытыы;
– ХАБЫЛЫК, ХААМЫСКА. “Төрүт оонньуу” остуол оонньуута;
– АТ СААДАХ. Атыынан сүүрдэн иһэн оҕунан ытыы;
– АТ СҮҮРДҮҮТЭ.
Олоҥхо ыһыаҕын күрэхтэһиилэрин бирииһин бүттүүн суумата – 3,5 мөлүйүөн солкуобай.
Күрэстэр балаһыанньаларын “Спорт Якутии” саайтыгар уонна социальнай ситимнэригэр көрүөххүтүн сөп.
“Спорт Якутии” саайт матырыйаалларынан.
