Туймаада ыһыаҕын кэмигэр тыҥааһынынан, күүрүүтүнэн-хаарыытынан “Дыгын оонньууларыттан” туох да итэҕэһэ суох, эмиэ илин-кэлин түсүһүүлээх, бэрт былдьаһыылаах, быыһагар харах уулаах “Дыгынчык оонньуулара” (“Игры Дыгынчика”) диэн саҥа улаатан эрэр уолаттарга анаммыт бэрт интэриэһинэй күрэс буолан ааста. Өрөспүүбүлүкэ араас улууһуттан барыта 40-ча сайаапка киирбит. Чөмпүйүөннэр уонна бириистээх миэстэҕэ тиксибит бэлэсипиэттэринэн, самакааттарынан уонна атын сыаналаах бириистэринэн наҕараадаланнылар
“Амма олоҕо” хаһыат уонна СӨ Ыччат министиэристибэтэ суруйалларынан, кырачаан боотурдар сахалыы дэгит күрэс үс көрүҥэр кииристилэр. 8-9 саастаах уолаттарга быйыл Амма лиссиэйин 3-с кылааһын үөрэнээччитэ 19 күрэсчити ырааҕынан куоһаран, бастакы миэстэ буолла.
Миша Амма лиссиэйин үһүс кылааһын үөрэнээччитэ. Кини бастакы кылаастан Чапчылҕаҥҥа Егор Скрябиҥҥи көҥүл тустуунан дьарыктанар. Улууска уонна өрөспүүбүлүкэҕэ ыытыллар күрэхтэһиилэрэ хас да төгүл бириистээх миэстэлэргэ тиксэтэлээбитэ. Быйыл бэс ыйын саҥатыгар Дьокуускай куоракка киирэн үөрэтэр-дьарыктыыр сүүмэрдээһиҥҥэ сылдьыбыьта. Онно өрөспүүбүлүкэҕэ биллэр, уопуттаах тириэньэрдэр Кузьма Сивцевкэ уонна “Дыгын оонньууларын” биир кылбар сулуһа Николай Обоевка дьарыктаммыта.
Миша “Дыгынчык оонньууларыгар” сүүмэрдээһин кэнниттэн кыттарга санаммыт. Күрэхтэһии иннинэ күн аайы бэйэтин баҕатынан дьиэтигэр дьарыктана сылдьыбыт. Оонньууларга аҕата Василий Тимофеевтыын кэлбит.
-- Күүскэ долгуйбатаҕым, бэйэбэр эрэнэр этим. Ол да буоллар Мэҥэ Хаҥалас, Таатта, Үөһээ Бүлүү, Анаабыр уонна Дьокуускай кыттааччылара олус күүстээхтэр этэ. Салгыы өссө күүскэ дьарыктаныам дии саныыбын, -- диэн кырачаан бөҕөс санаатын үллэстэр.
Мишаҕа өссө ситиһиилэри баҕарабыт. Бу кыайыы “Дыгын оонньууларын” аартыгын арыйдын.
“Дыгынчык оонньууларын” түмүгэ
6—7 саастаахтар (2019—2020 с.т.):
1 миэстэ – Дуолан Горохов (Горнай);
2 миэстэ – Давид Шутиков (Дьокуускай);
3 миэстэ – Эрсан Гоголев (Дьокуускай).
8—9 саастаахтар (2017—2018 с.т.):
1 миэстэ – Михаил Тимофеев (Амма);
2 миэстэ – Бэргэн Ширяев (Анаабыр);
3 миэстэ – Дамир Ноговицын (Дьокуускай).
10—11 саастаахтар (2015—2016 с.т.):
1 миэстэ – Кирилл Березкин (Өймөкөөн);
2 миэстэ – Эрсан Сунхалыров (Дьокуускай);
3 миэстэ – Леонид Шеломов (Дьокуускай).
Көрөөччүлэр биһирэбиллэрэ – Айсен Заболоцкай (Үөһээ Бүлүү).
Бэй.кэр.
Хаартыска: Александр Гаврильев.
