Атырдьах ыйын 30 күнүгэр Дьокуускайга “Өрөгөй” успуорт комплексыгар “Вызов севера” профессиональнай буокса түһүлгэтэ буолар. Рингэҕэ Арассыыйа, Узбекистан, Флиппин, Конго уонна Иран бэрэстэбиитэллэрэ көрсүөхтэрэ. Сүрүн, интэриэһинэй киирсиилэри Петр Васильевтан уонна Михаил Варламовтан күүтэбит.
“Турнир Буокса норуоттар икки ардыларынааҕы ассоциациятын (IBA) өйөбүлүнэн ыытыллар. Бу 2023 сылтан төрдүс турнир, оттон профессиональнай буоксаҕа – иккис. Билэргит курдук, бу иннинэ биһиги муус устарга Дьокуускайга “Битва за контракт” киирсиини тэрийбиппит. Онно Саха сирэ улахан күрэхтэһиини үрдүк таһымнаахтык тэрийиэн сөбүн көрдөрбүтэ. Ол туоһута буолан биһиэхэ IBA кэлэр буолла”, – диэн СӨ Буокса федерациятын бэрэссэдээтэлин солбуйааччы Василий Егоров кэпсээтэ.
