Быйыл сайын, биллэрин курдук, Аммаҕа Саха сирин VII успуорка оонньуулара ыытыллыбатахтара
Ол да буоллар былааннаммыт улахан успуорт эбийиэктэригэр тутуу үлэтэ бара турда. Ааспыт субуотаҕа (балаҕан ыйын 15 күнүгэр) Амма сэлиэнньэтигэр 3 000 көрөөччү олорор стадион уонна аныгылыы тииптээх улахан успуорт саалата үлэҕэ киириилэрин үөрүүлээх быһыыга-майгыга бэлиэтээтилэр. Стадион төгүрүк сылы быһа үлэлиир, ититиллэр манежтаах. Наада буоллаҕына стадиоҥҥа өссө 1 000 киһи олорон эрэ көрөр трибуналарын таҥыахтарын сөп.
Амма улууһа, уу халааннааһыныттан төһө да эмсэҕэлээтэр, тутааччылар үлэлээбиттэрин курдук үлэлии сылдьыбыттар. Манна тутааччылар хайа охсубут аҥаардара Амма олохтоохторо буолалларын тоһоҕолоон бэлиэтиэххэ наада. Улуус киинин тэрилтэлэрэ стадион территориятын ыраастааһыҥҥа, көҕөрдүүгэ үлэлээбиттэр. Стадион аныгы ирдэбилгэ толору эппиэттиир. Ол курдук путбуол хонуута, сүүрэр суоллар, ыстанар сиэктэрдэр үрдүк хаачыстыбалаах матырыйаалларынан бүрүллүбүттэр. Сүүрэр суол халлаан күөх өҥнөөх.
Икки этээстээх, толору хааччыллыылаах таас успуорт саалата Амматааҕы оҕо успуорка оскуолатыгар бэрилиннэ. Бу оскуолаҕа оҕолор 12 успуорт көрүҥүнэн дьарыктаналлар. Сүрүн көрүҥнэринэн көҥүл тустуу, волейбол, чэпчэки атлетика, хайыһарынан сүүрүү, биатлон уонна хапсаҕай буолаллар.
Аммаҕа Саха сирин VII Успуорка оонньуулара эһиил сайын от ыйын 4-8 күннэригэр ыытыллыахтара. Онно элбэх ыалдьыт, спортсмен ити успуорт эбийиэктэригэр сылдьыаҕа, күрэхтэһиэҕэ.
