Сотору кэминэн (алтынньы 12-21 күннэригэр) Дьокуускайга буоксаҕа Арассыыйа чөмпүйэнээтэ ыытыллаары турар
Ити күрэхтэһии сүрүн сыала-соруга – Европа чөмпүйэнээтигэр боксуордары сүүмэрдээһин. Дьокуускайга барыта 425 (спортсменнар, тириэньэрдэр, судьуйалар, бочуоттаах ыалдьыттар) киһи кэлэрэ былааннанар. Чөмпүйэнээт ыытыллар миэстэтэ – “Триумф” успуорт комплекса.
Арассыыйа буоксаҕа чөмпүйэнээтэ Дьокуускайга аан бастаан 2007 сыл сааһыгар “Кыайыы 50 сыла” успуорт дыбарыаһыгар ыытыллыбыта. Ити күрэхтэһиигэ Георгий Балакшин чөмпүйүөннээбитэ, эһиилигэр (2008) Олимпиада боруонса призёра буолбута. Саха сирин хамаандатын биэс боксуора боруонса мэтээли ылбыта: Дмитрий Винокуров (49 кг), Семен Степанов (51 кг), Николай Дмитриев (54 кг), Афанасий Поскачин (57 кг) уонна Вадим Лихман (91 кг).
Саха сирин сүүмэрдэммит хамаандата чөмпүйэнээккэ бэлэмнэнэн, хас да түһүмэхтээх үөрэтэр-эрчийэр тэрээһини ааста. Билигин боксуордарбыт быһаарыылаах түһүмэххэ, “Триумф” успуорт комплексын буоксаҕа саалатыгар былаан быһыытынан дьарыктана сылдьаллар.
Иллэрээ күн (алтынньы 2 күнүгэр) успуорт миниистирэ Георгий Балакшин Саха сирин хамаандатын боксуордарын кытта көрүстэ. Көрсүһүү кэмигэр спортсменнарга уонна тириэньэрдэргэ “Таҥас” пиирмэ экипировката туттарылынна.
– Арассыыйа чөмпүйэнээтэ саҕаланара олох аҕыйах күн хаалла, – диэтэ Георгий Балакшин. – Үөрэтэр-эрчийэр тэрээһин былаан быһыытынан ыытылынна, билигин үчүгэй түмүктэри көрдөрүөххүт диэн эрэнэ кэтэһэбит. Дьиэбитигэр-уоппутугар ыытыллар күрэхтэһиигэ туох баар кыаххытын, сатабылгытын ууран туран киирсиэхтээххит. Эһигини өрөспүүбүлүкэ бүттүүнэ кэтээн көрүөҕэ.
Сүрүн тириэньэр Артур Пахомов хамаанда састаабын билиһиннэрдэ. Кини: “Кэлин кыра уларыйыылар тахсыахтарын сөп”, – диэн тоһоҕолоон бэлиэтээтэ.
Бу күннэргэ чөмпүйэнээти тэрийэр кэмитиэт киирии билиэттэр сыаналарын бигэргэттэ. Алтынньы 13-17 күннэригэр барыллаан киирсиилэр буолуохтара. Ити күннэргэ киирии босхо. Чөмпүйэнээт бырагырааматын быһыытынан алтынньы 19 күнүгэр (бээтинсэҕэ) ыйааһын аайы финал аҥаарын киирсиилэрэ ыытыллыахтара. Ити киирсиилэри көрүү төлөбүрдээх. Билиэт сыаната – 400 солкуобай. Кыһыл көмүс иһин быһаарыылаах киирсиилэр сарсыныгар (алтынньы 20 күнүгэр) буолуохтара. Билиэт сыаната – 600 солкуобай.
Чөмпүйэнээккэ 70 волонтер үлэлиэхтээх. Кинилэр анал формалаах буолуохтара. Волонтердар үлэлэрин хайысхата элбэх: дэлэгээссийэлэри көрсүү, уопсай боппуруостарга ыйан-кэрдэн, сүбэлээн биэрии, көрөөччүлэри кытта үлэ. Хас биирдии дэлэгээссийэҕэ волонтердар сыстан үлэлиэхтээхтэр.
Күрэхтэһиигэ элбэх бочуоттаах ыалдьыт кэлэрэ күүтүллэр. Ол курдук, Арассыыйа Буоксаҕа федерациятын генеральнай сэкирэтээрэ Умар Кремлев, эрэгийиэннэр федерацияларын салайааччылара кэлиэхтээхтэр. Урукку өттүгэр аан дойду түһүлгэлэригэр соргулаахтык күрэхтэспит боксуордары тэрийэр кэмитиэт эмиэ ыҥырбыт. Ол курдук Дьокуускайга Александр Поветкин, Олег Саитов, Алексей Тищенко, Гайдарбек Гайдарбеков, Рахим Чахкиев, Евгений Макаренко кэлиэхтэрин сөп. Ким чопчу кэлэрин чөмпүйэнээт саҕаланара биир-икки күн иннинэ билиэхпит.
Федор РАХЛЕЕВ.
Арассыыйа чөмпүйэнээтигэр Саха сирин сүүмэрдэммит хамаандатын састааба:
49 кг: Василий Егоров, Борис Сидоров, Николай Матвеев.
52 кг: Николай Григорьев, Дьулус Яковлев, Артур Ложников.
56 кг: Игнат Сивцев.
60 кг: Михаил Варламов, Айтал Дьяконов, Прокопий Яковлев.
64 кг: Алкивиад Иванов, Петр Васильев.
69 кг: Виктор Панченко.
75 кг: Роман Обутов.
91 кг: Алексей Шахов, Вадим Лихман.
Тириэньэрдэр – Артур Пахомов (сүрүн тириэньэр), Владимир Павлов, Артем Максимов, Аркадий Ушканов, Александр Самойлов, Андрей Слепцов, Дмитрий Прокопьев.
