Бу субуотаҕа (алтынньы 6 күнүгэр) Эмиэрикэ Лас-Вегас куоратыгар UFC (ити тугун-ханныгын аллара быһаарабыт) сүрүн хапсыһыыта буолар
Арассыыйа да ити саҥа хамсааһынтан хаалсыбат. Балаҕан ыйын 15 күнүгэр Москубаҕа устуоруйаҕа аан бастаан UFC чөмпүйэнээтэ ыытыллыбыта. Ити күрэхтэһии UFC кылгас устуоруйатыгар киирдэ. Ол курдук Москуба “Олимпийскай” диэн успуорт комплексыгар хапсыһыылары 22 603 көрөөччү кэлэн көрбүт. Ити UFC устуоруйатыгар бэһис көрдөрүү.
Дагестантан төрүттээх (омуга авар) Хабиб Нурмагомедов – чэпчэки ыйааһыҥҥа UFC чөмпүйүөнэ. Кини балаҕан ыйыгар лоп курдук отутун туолбута. Хабиб Нурмагомедов бу сыл муус устарыгар Арассыыйаттан аан бастаан UFC чөмпүйүөнүн курун иилиммитэ (чөмпүйэнээккэ эриэйтин систиэмэтэ киллэриллиэҕиттэн). “Хабиб Нурмагомедов бүгүҥҥү туругунан Арассыыйа аан дойдуга саамай биллэр-көстөр спортсменнарыттан биирдэстэрэ”, – диэтэххэ, хайдах да баһан этии буолбат. Итини социальнай ситимнэр да көрдөрөллөр. Холобур, Хабиб Нурмагомедов Инстаграмҥа 5 600 000 сурутааччылаах. Ити көрдөрүүнү 3 300 000 сурутааччылаах тиэннис “сулуһа” Мария Шарапованы кытта тэҥнээн көрүөххэ сөп.
Оттон Ирландия байыаһа Конор Макрегор диэн кимий-тугуй? Кини Хабиб Нурмагомедовтыын эт саастыы. Конор Макгрегор орулуур отутун от ыйыгар туолбута. Ирландия байыаһа “Forbes” диэн сурунаал биэрсийэтинэн аан дойдуга саамай үрдүк дохуоттаах спортсменнартан биирдэстэрэ (төрдүс миэстэҕэ туруорбуттар). Оттон UFC эйгэтигэр саамай элбэх үптээх-харчылаах, дохуоттаах байыаһа буолара саарбахтаммат.
Конор Макгрегор – UFC устуоруйатыгар аан бастакынан икки ыйааһыҥҥа чөмпүйүөннээбитэ. Былырыын кини аан дойду бастыҥ боксуора Флойд Мейвезери кытта буокса быраабылатынан күөн көрсүбүтэ уонна тиһэх рауҥҥа кыайтарбыта. Ити, хайдаҕын да иһин, Конор Макгрегор буоксаҕа күүһүн-кыаҕын көрдөрөр. Онон тустуу ньымаларын хото туттар Хабиб Нурмагомедовы кытта хапсыһыыта бэрт интэриэһинэй буолара күүтүллэр.
Хабиб Нурмагомедов уонна Конор Макгрегор бэйэ-бэйэлэрин хабырдык саҥарсыбыттара, араастык хаарыйсыбыттара ыраатта. Утарыта турсуу икки сыллааҕыта саҕаламмыта. 2016 сыл алтынньытыгар Нью-Йорк куоракка Хабиб Нурмагомедов Эмиэрикэ байыаһа Майкл Джонсоны кыайбыта. Бу иннинэ, ыйааһыннаныы кэнниттэн Нурмагомедов уонна Макгрегор охсуһа сыспыттара. Тутуһуу буолуоҕун арыаллыы сылдьааччылара нэһиилэ тохтоппуттар. Онно Хабиб Нурмагомедов Конор Макгрегорга “эн диэхтээн, чоппууска буоллаҕыҥ” диэбитэ аан дойдуну тилийэ сүүрбүтэ. Дьэ, итинтэн ыла социальнай ситимнэргэ “сэрии уота” күүдэпчилэммитэ. Суруналыыстарга ол эрэ наада буоллаҕа, “кыраһыыннаан” да биэрии суох буолбатах.
Итинник күүркэйии, тыҥааһын ханнык эрэ түгэҥҥэ дэлби барыахтаах. Бу сыл муус устарыгар Конор Макгрегор доҕотторунаан UFC чөмпүйэнээтин байыастара олорон иһэр оптуобустарыгар саба түспүтэ. Онно Хабиб Нурмагомедов эмиэ баар эбит. Оптуобус түннүгүн тааһынан тамнааһын эҥин буолбут да, хата, ким да эчэйбэтэх. Конор Макгрегор ити нэгэй быһыытын иһин түрмэҕэ хаайылла сыспыта.
Уопсайынан, бу сылга Конор Макгрегор даҕаны, Хабиб Нурмагомедов даҕаны дьон болҕомтотун тартылар аҕай. Егор Булаткин-Егор Крид диэн хип-хоп истиилинэн ыллыыр ырыаһыт кэнсиэрэ Махачкалаҕа ыытыллыбат буолбутуттан олус үөрбүтүн туһунан Хабиб Нурмагомедов Инстаграмҥа суруйбута. Ити суруйуутун иһин Егор Крид UFC байыаһа да буолбутун иһин сөбүлээбэтэҕин биллэрдэҕэ дии. Ити кириитикэҕэ эмиэ ырыаһыт, продюсер Тимур Юнусов-Тимати кыттыспыта. Онно Хабиб Нурмагомедов өссө эбии уордайан, кыйыттан туран хоруйдаабыта. Ити утарыта турсууну сымнатаары, эйэлэһиннэрээри бэл Чечня аҕа баһылыга Рамзан Кадыров тыл этэн турар. Билигин: “Конор Макгрегор утарылаһааччытын өссө эбии кыынньаары хапсыһыыга Егор Крид ырыатынан доҕуһуоллатан тахсыан сөп”, – диэн суруйаллар. Хайдах буолар...
Соторутааҕыта (балаҕан ыйын 20 күнүгэр) Эмиэрикэ Нью-Йорк куоратыгар Конор Макгрегор уонна Хабиб Нурмагомедов алтынньы 6 күнүгэр буолуохтаах хапсыһыыга анаммыт пресс-кэмпириэнсийэлэрэ ыытыллыбыта. Итинник тэрээһиннэргэ суруналыыстар да, атын да дьон харчы төлөөн киирэллэр эбит. Онон Макгрегор уонна Нурмагомедов бэйэ-бэйэлэрин тылынан суустаһыахтаахтара эрдэттэн биллэрэ. Чэ, ол пресс-кэмпириэнсийэҕэ туох дэспиттэрин эридьиэстээмиэҕиҥ. Бүгүн (алтынньы 4 күнүгэр) Лас-Вегаска эмиэ пресс-кэмпириэнсийэ ыытыллыахтаах.
Аан дойду мөлүйүөнүнэн дьонун болҕомтотун тардыллыбыт хапсыһыы буолара бу кэллэ. Дьэ, көрүөхпүт, хайалара буоларын... Суустаһыы суустаһыынан, ким ордук күүстээҕин хапсыһыы түһүлгэтэ быһаарыаҕа.
Федор РАХЛЕЕВ
