«Азия оҕолоро» Норуоттар икки ардыларынааҕы I кыһыҥҥы спортивнай оонньууларын тэрийэр кэмитиэт састаабар уларыйыылар киирдилэр. Бу туһунан дьаһалга АФ Бырабыыталыстыбатын Бэрэссэдээтэлэ Дмитрий Медведев илии баттаата.
Тэрийэр кэмитиэт састаабыгар Госдума спуорка, туризмҥа уонна ыччат дьыалатыгар Кэмитиэтин чилиэнэ, Татарстан Өрөспүүбүлүкэтин Олимпийскай Сэбиэтин Бэрэссэдээтэлэ Марат Бариев, Госдума спуорка, туризмҥа уонна ыччат дьыалатыгар Кэмитиэтин бэрэссэдээтэлэ Михаил Дягтярев киирдилэр. Оттон Сахалин уобалаһын урукку губернатора Олег Кожемяко кэмитиэт састаабыттан таҕыста.
«Азия оҕолоро» омуктар икки ардыларынааҕы спуорт оонньуулара түөрт сылга биирдэ ыытыллар. Сүрүн сыал – Олимпийскай хамсааһыны, оҕо уонна ыччат спуордун сайыннарыы. Сахалиҥҥа ыытыллар кыһыҥҥы оонньууларга сайаапка киириитинэн, барыта 21 судаарыстыба кыттара сабаҕаланар. Хас биирдии дойду хамаандата аҕыс спуорт көрүҥэр 84 кыттааччыны аҕалар: сноуборд, биатлон, трамплинтан ыстаныы, шорт-трек, хоккей, фигурнай хаҥкылааһын, хайыһар күрэҕин икки көрүҥэ.
«Азия оҕолоро» кыһыҥҥы оонньуулары сүрэхтээһин Уһук Илин экэниэмикэ форумугар ыытыллыбыта.
Евгения Васильева
