“Азия оҕолоро” норуоттар икки ардыларынааҕы I кыһыҥҥы оонньуулар тэрийээччилэрэ кыттааччылартан сайаапкалары күүтэллэр. Ол туһунан Новосибирскай куоракка буолбут күрэхтэһии презентациятыгар, оонньуулар норуоттар икки ардыларынааҕы комитетын бэрэсидьиэнэ Дмитрий Глушко иһитиннэрдэ.
“Биһиги бу күҥҥэ 20 дойдуттан уонна РФ 9 субъегыттан кыттар хамаандалар сайаапкаларын тутан олоробут. Эбии үс дойдуттан сайаапкалары күүтэбит. Уопсайа тыһыынча кэриҥэ күрэхтэһээччи кыттара күүтүллэр. Инфраструктура чааһа бэлэм. РФ спорт көрүҥнэрин федерациятын салайааччылара объектары бэрэбиэркэлээбиттэрэ. Барыта норуоттар икки ардыларынааҕы ирдэбилгэ толору эппиэттииллэр”, — диэн Глушко кэпсээтэ.
“Азия оҕолоро” норуоттар икки ардыларынааҕы I кыһыҥҥы оонньуулар 2019 сыл олунньу 8-17 күннэригэр Южно-Сахалинскайга ыытыллыаҕа.
Күрэхтэһээччилэр 8 көрүҥҥэ: биатлоҥҥа, хайа хайыһарыгар, хайыһарынан сырсыыга, трамплинтан ыстаныыга, фигурнай хаҥкылааһыҥҥа, сноубордка, хоккейга уонна шорт-трекка күөн көрсүөхтэрэ. Бу оонньуулар 2020 сылга буолар ыччат кыһыҥҥы Олимпийскай оонньууларыгар бэлэмнэнии курдук буолар.
“Азия оҕолоро” I кыһыҥҥы оонньуулар норуоттар икки ардыларынааҕа Олимпийскай комитет, Азия Олимпийскай сэбиэтин, РФ Бырабыыталыстыбатын уонна Арассыыйа Олимпийскай комитетын өйөбүллэринэн ыытыллар.
