Үгэскэ кубулуйбут чөмпүйүөннэр Бааллара номнуо 30-с төгүлүн “Триумф” спорт комплексыгар буолан ааста. Манна Саха сирин бастыҥ спортсменнара муһуннулар.
Ил Дархан аатыттан эҕэрдэ тылы СӨ Барыбыыталыстыбатын уонна Ил Дархан администрациятын салайааччы Федор Борисов эттэ уонна спортсменнар оҕолорго, ыччакка холобур буолалларын бэлиэтээтэ.
Спорт миниистирэ Иннокентий Григорьев быйыл Саха сирин спорсменнара эрэгийиэннээҕи, бүтүн Арассыыйатааҕы уонна Аан дойдутааҕы таһымнаах күрэхтэһиилэргэ, уопсайа 945 наҕарааданы ылбыттарын, олортон 340 – кыһыл көмүс, 302 – үрүҥ көмүс, 303 – боруонса уонна 34 Арассыыйа, 15 Аан дойду, 10 Европа чөмпүйүөннэрэ тахсыбыттарын киэн тутта кэпсээтэ.
Ону таһынан, бу сылга ыытыллыбыт сүдү суолталаах күрэхтэһиилэри бэлиэтээтэ. Бастакынан, Дмитрий Коркин төрөөбүтэ 90 сылыгар анаммыт тустууга XI норуоттар икки ардыларынааҕы турнир, манна 33 дойдуттан бастыҥ спортсменнар күөн көрсүбүттэрэ. Иккиһинэн, боксаҕа Арассыыйа чемпионатыгар 60 тахса эрэгийиэнтэн күрэхтэспиттэрэ. Үсүһүнэн, сэтинньи ыйга буолбут мас тардыһыыга III Аан дойдутааҕы чемпионакка 39 дойдуттан ордук күүстээх мадьынылар киирсибиттэрэ.
“Бастыҥ муниципальнай тэриллии” номинацияҕа Сунтаар улууһа кыайыыны ситистэ. “Бастыҥ спортивнай уопсастыбаннай түмсүү” – панкратион федерацията, “Бастыҥ спортивнай тэрийээччи-меценат” — “Fitness Life” кулууп генеральнай дириэктэрэ Виктор Салтыков, “Олорор сиргэ бастыҥ тэрийээччи” – Амма улууһун Эмис нэһилиэгин баһылыга Илья Пестерев, “ГТО киллэриигэ бастыҥ тэрийээччи” – Нерюнгри оройуонун тестирование Киинин салайааччыта Анна Григорьева, “Спортка үлэлээһин” – СӨ спордун уонна физическай култууратын үтүөлээх үлэһитэ Петр Платонов, “Спорду сайыннарыыга кылаатын” иһин саха төрүт оонньууларын спартакиадатын төрүттээбит Афанасий Алексеев.
10 бастыҥ спортсменнар:
Доруобуйаларыгар хааччахтаах спортсменнар ортолоругар оҕолорго Татьяна Бурым уонна Андрей Винокуров, улахан дьоҥҥо — Степанида Артахинова уонна Владимир Балынец. Саха төрүт оонньууларыгар Наталья Черноградская уонна Павел Черноградскай. “Бастыҥ спортсменнар” оҕолорго — Алена Большакова уонна Валерий Андросов, улахан дьоҥҥо Сардаана Трофимова уонна Василий Егоров.
