Бүгүн, кулун тутар 14 күнүгэр Дьокуускайга, тустууга Арассыыйа сүүмэрдэммит хамаандатын сүрүн тренерэ Дзамболат Тедеев кэллэ. Кини аан дойду кубогар саамай күүстээх хамаандалар кытталларын бэлиэтээтэ. Онон Арассыыйа хамаандатын соруга сүдү суолталааҕын эттэ.
“Аан дойду кубога Саха сиригэр буолара дойду сүүмэрдэммит хамаандатыгар икки төгүл эппиэтинэһи сүктэрэр. Онон биһиги дьоһун күрэхтэһиини көрдөрүөхтээхпит. Көбүөргэ 20 бөҕөс тахсыаҕа. Бары ыйааһыҥҥа кыттабыт. Утарылаһааччылартан көрөн ханна үөрүйэх бөҕөстөрү туруорарбытын быһаарыахпыт. Эдэрдэргэ эмиэ бэйэлэрин көрдөрөллөрүгэр кыах биэриэхпит”, – диэн Дзамболат Тедеев кэпсээтэ.
Ону таһынан, саха бөҕөстөрө Виктор Рассадин уонна Арыйаан Тютрин үчүгэй туруктаахтарын эттэ:
“Роман Дмитриев, Павел Пинигин, Виктор Лебедев курдук бастыҥ бөҕөстөрү иитэн таһаарбыт саха оскуолата аан дойдуга биллэр. Онон саха бөҕөстөрө кыраһыабай тустууну көрдөрүөхтэрэ, биир дойдулаахтарын үөрдүөхтэрэ диэммин эрэнэбин. Уолаттар Сочи куоракка бэлэмнэннилэр. Туруктара үчүгэй, хонтуруолунай киирсиилэргэ бэйэлэрин үчүгэйдик көрдөрбүттэрэ”.
Санатабыт, Арассыыйа сүүмэрдэммит хамаандатыгар тустууга Аан дойду чөмпүйүөнэ (2018) Заурбек Сидаков, Европа чөмпүйүөннэрэ Даурен Куруглиев уонна Гаджимурад Рашидов (2017) уо.д.а. киирдилэр.
