Муус устар 9-10 күнүгэр Чурапчы улууһугар “Аҕа күрэҕэ” диэн өрөспүүбүлүкэтээҕи куоталаһыы буолуоҕа. Сүүмэрдиир түһүмэхтэр номнуо Дьокуускайга уонна Намҥа ыытылыннылар.
Саха сирин аҕалар лигаларын бэрэссэдээтэлэ Айхал Габышев маннык кэпсиир: “Хомойуох иһин, үгүс эдэр ыал аҕа баһылыгы булар-талар, иитэр, кэргэнин, оҕолорун баҕа санааларын толорор, дьиэ кэргэн ороскуотун уйунар эрэ киһи курдук саныыллар. Ол эрэн, оҕону иитиигэ аҕа оруола олус улахан. Ол иһин, “Аҕа күрэҕин” тэрийэбит”.
Кулун тутар 23-24 күнүгэр Дьокуускайга сүүмэрдиир түһүмэх үрдүк таһымҥа буолан ааста. Саха гимназиятын аҕаларын сэбиэтин чилиэнэ, Дьокуускай куорат аҕаларын сэбиэтин толорооччу дириэктэрэ Яков Оконешников санаатын үллэстэр: “Күрэстэһии кулун тутар 23-24 күнүгэр буолан ааста. Тэрээһин үөрүүлээх аһыллыытыгар куорат баһылыга Сардана Авксентьева, баһылык бастакы солбуйааччыта Владимир Федоров, аҕалар лигаларын бэрэссэдээтэлэ Айхал Габышев, СӨ үлэ уонна социальнай сайдыы миниистирин солбуйааччы Афанасий Постников кыттыыны ыллылар. Сэттэ хамаанда куоталаста. Күрэстэһии бастакы күнүгэр бэйэлэрин билиһиннэрдилэр, олохтоммут нормативы туттардылар, эстафетаҕа куоталастылар уонна өркөн өйдөрүн тургутан көрдүлэр. Иккис күнүгэр биатлоҥҥа куоталастылар, остуолбаҕа ытыннылар, ойбон аллардылар, оттук маһы бэлэмнээтилэр”.
Сүүмэрдиир түһүмэх түмүгүнэн бастакы миэстэни Роман Константинович, Александр Птицыннар ыллылар (Губинскай уокуруг); 2 миэстэ – Вячеслав Александрович, Александр Слепцовтар (Киин уокуруг); 3 миэстэ – Игнат Ильич, Ринат Поповтар (Маҕан бөһүөлэгэ).
Нам улууһугар сүүмэрдиир түһүмэх
Нам улууһун аҕаларын сэбиэтин бэрэссэдээтэлэ Мичил Герасимов: “Уопсайа алта хамаанда кытынна. Ол иһигэр Хамаҕатта нэһилиэгиттэн – икки хамаанда. Күрэстэһии Үөдэй нэһилиэгэр буолла. Кыттааччылар: Иннокентий Семенович, Станислав Кривошапкиннар, Илья Ильич, Максим Заболоцкайдар (Хамаҕатта), Дмитрий Семенович, Эдгард Поповтар (Модут), Петр Андреевич, Валерий Ильиннар (Аппааны), Дмитрий Дмитриевич, Артур Семеновтар (Бартыһаан), Иннокентий Михайлович, Юлиан Ивановтар (Үөдэй). Дьокуускайга курдук алта көрүҥҥэ күрэхтэстилэр. Бастакы миэстэни Семеновтар, иккиһи – Поповтар, үсүһү – Ивановтар ыллылар”.
Сүүмэрдиир күрэстэһиилэр кыайыылаахтара финалга кыттыахтара. Онон муус устар ыйга өрөспүүбүлүкэтээҕи күрэстэһиигэ улуустарын эбэтэр кураттарын чиэһин көмүскүөхтэрэ. Кинилэргэ ситиһиини баҕарыахха.
