Эдьигээҥҥэ “Мэйээн уола” национальнай многоборьеҕа 15 бөҕөс күөн көрүстэ

Эдьигээн оройуонун биллэр-көстөр спортсмена, Дыгын, Манчаары оонньууларын, республиканскай спартакиада хас да төгүллээх кыттыылааҕа, Баһаарынай чаас байыаһа Николай Лесовой өр кэмҥэ ыра санаа оҥостубут баҕа санаата туолла. Национальнай многоборье көрүҥнэригэр “Мэйээн уола” күрэҕи тэрийэн ыытта.

Эдьигээҥҥэ буолбут “Мэйээн уола” күрэхтэһиигэ 15 бөҕөс аҕыс көрүҥҥэ ким быһыйын-сымсатын, күүстээҕин быһаарыстылар. Бастакы үс миэстэҕэ тиксибит бөҕөстөр спонсордар туруорбут сыаналаах бириистэрин бэлэх туттулар.

Кыттааччылар хапсаҕай, мас тардыһыыта, өһөс торбос, тутум эргиирэ, үс төгүл үс, ох саанан ытыы, таас көтөҕүүтэ, челночнай сүүрүү курдук тыҥааһыннаах түһүмэхтэргэ кииристилэр. Бу тэрээһиҥҥэ аҥардас Эдьигээн оройуонун спортсменнара эрэ буолбакка Бүлүү улууһун Сыдыбыл нэһилиэгин баһаарынай чааһын байыаһа Иннокентий Ефремов кэлэн кыттан, күрэс таһымын өссө үрдэттэ. Ону сэргэ, национальнай, хотугу многоборьеларга СӨ уонна Россия маастара, Саха сирин биир биллиилээх спортсмена, Бүлүү улууһун баһаарынай чааһын байыаһа Николай Николаев күрэх кылаабынай судьуйатынан үлэлээтэ.

Күрэскэ 17-тэн үөһэ саастаах эр бэртэрэ кытыннылар. Хас биирдии көрүҥ аайы кыайыылаахтар быһаарыллан, үс бастыҥ миэстэлээхтэр спонсордар туруорбутхарчынан бэлэхтэри тутан истилэр. Ол курдук, элбэх көрөөччүлээх, ыалдьааччылаах бастакы түһүмэххэ – хапсаҕайга Кыстатыам уола Альберт Устинов утарылаһааччыларын кыайан, үрдүк ситиһиилэннэ уонна оройуон дьаһалтата туруорбут 10 тыһ. солк. суумалаах сертификатын бэлэх тутта. Маны сэргэ, “Үс төгүл үс” ыстаныы көрүҥэр Кыстатыам бөҕөһө Айтал Колтовской 12 миэтирэ 68 см ойон, тэҥнээхтэрин булбата. Киниэхэ кыайыытын иһин күрэх кылаабынай судьуйата Николай Николаев анал бирииһин – илиигэ кэтиллэр  чаһыны бэлэх уунна. Оттон өчөс торбос түһүмэххэ эмиэ Альберт Устинов бастаан, “Пила торцовочная”  диэн тэрили сүүйдэ.

«Таас көтөҕүүтэ” ыарахан көрүҥҥэ кыттааччылар туох баар күүстэрин, кыахтарын ууран туран, 80 киилэ ыйааһыннаах кууллаах кумаҕы көтөхтүлэр. Данил Евсеев 173 миэтирэ уһуну баран, кимиэхэ да ситтэрбэтэ, ол түмүгэр киниэхэ сварочнай аппарат анал бириис туттарылынна.

Николай Николаев, күрэх кылаабынай судьуйата: «Мин Николай Лесовойдуун “Дыгын оонньууларыгар” бииргэ кыттыахпытыттан ыла билсэбит, табаарыстаһабыт. Мин кинини кыахтаах спортсмен быһыытынан сыаналыыбын. Иккиэн да биир эйгэҕэ баһаарынай сулууспаҕа үлэлиибит. Бу национальнай многоборье көрүҥнэрин дойдутугар сайыннараары, пропагандалаары маннык күрэҕи тэрийэн эрэрин хайгыы истибитим уонна үөрүүнү кытта, доҕорбун өйөөрү, күүс-көмө буолаары ыраах Эдьигээн сиригэр ыытааччы Владимир Веревкин, ырыаһыт Петр Николаев буоламмыт кэлэн кыттыыны ыллыбыт».

Кыттааччылары сэргэ, күрэҕи тэрийээччи Николай Лесовой саамай бастыҥ икки көрөөччүгэ, ыалдьааччыларга бэйэтэ туруорбут анал бириистэрин туттартаата. Онно Анна Даниловна Константинова уонна Богдан Гуменюк тигистилэр.

Николай Лесовой, “Мэйээн уола” күрэҕи тэрийээччи: «Мин бэйэм аан бастаан “Дыгын оонньуулара” күрэххэ 2013 сыллаахха кыттыбытым, онтон ыла бу национальнай многоборье көрүҥнэрин сөбүлээн дьарыктанан барбытым. Эдьигээҥҥэ бу көрүҥ улаханнык сайда илик, ол иһин уолаттары мунньан, спонсордары булан, сүүрэн-көтөн бу тэрээһиним үрдүк таһымнаахтык барбытыттан олус үөрэн, долгуйан турабын. Эдьигээн оскуолатыгар чаас ылан национальнай многоборьеҕа оҕолору дьарыктыыбын. Мин бэйэм Кыстатыам нэһилиэгиттэн төрүттээхпин. Дойдубуттан ырааҕа суох Мэйээн диэн үрэххэ оҕо эрдэхпиттэн бултаан-алтаан, балыктаан кэллим. Бу үрэххэ урут бэрт күүстээх, сымса, быһый дьон олорбуттара диэн биир дойдулаахтарым кэпсииллэрин элбэхтик истибитим. Ол иһин күрэхпин “Мэйээн уола”  диэн ааттаатым. Түгэнинэн туһанан, тэрээһини ыытарга күүс-көмө, сүбэ-ама, өйөбүл буолбут дьоҥҥо барҕа махталбын тиэрдэбин».

Ол курдук, аҕыс көрүҥ уопсай түмүгүнэн “Мэйээн уола” үрдүк ааты Кыстатыамтан төрүттээх Данил Евсеев ылан чемпион курун баанна уонна 60 тыһ. солк. суумалаах сертификаты бэлэх тутта.

Данил Евсеев, “Мэйээн уола” күрэх кыайыылааҕа: “Мин бэйэм Эдьигээн нэһилиэгэр олорор 5 оҕолоох Евсеевтар дьиэ кэргэттэригэр төрөөбүтүм. Билигин Дьокуускайдааҕы автодорожнай техникумҥа 1-кы кууруска үөрэнэбин. Ону сэргэ Иван Белолюбскай “Боотур” кулуубугар дьарыктанабын. Үөрэхпиттэн көҥүллэтэн, дойдубар бу “Мэйээн уола”  күрэххэ кытта кэлбитим. Кыайыы өрөгөйүн билэн олус долгуйдум, үөрдүм уонна кыайыыбын быйыл үбүлүөйүн бэлиэтээбит күндү ийэбэр бэлэх уунабын ”.

Бу тэрээһин тиһигин быспакка, өйөөччүлэр, спорт бу көрүҥнэрин сэҥээрээччилэр көмөлөрүнэн инникитин ыытылла, сайда туруо диэн тэрийээччи эрэнэр. Оттон элбэх кыттааччыны, көрөөччүнү биир түһүлгэҕэ түмпүт “Мэйээн уола” күрэх умнуллубат спорт биир кэрэ түгэнин бэлэхтээтэ.

Мария Аполлонова, ulusmedia.