Бэҕэһээ Пхенчханнааҕы Олимпиада дьоруойдара Кириэмилгэ дойду бэрэсидьиэнэ Владимир Путины кытары көрүстүлэр.
Бэрэсидьиэн үөрүүлээх быһыыга-майгыга судаарыстыбаннай наҕараадалары туттартаата. 46 атлет мэтээлгэ уонна уордьаҥҥа тигистэ. Фигурнай хаҥкылааһыҥҥа кыһыл, үрүҥ көмүс мэтээллэри ылбыт Алина Загитова уонна Евгения Медведева Доҕордоһуу уордьанын ыллылар. Хоккейга сүүмэрдэммит хамаанда кыттыылаахтара, итиэннэ хайыһарга үрүҥ көмүһү аҕалбыт Александр Большунов уонна Денис Спицов эмиэ Доҕордоһуу уордьанын ыллылар. Атыттар – “За заслуги перед Отечеством” I уонна II истиэпэннээх уордьан мэтээлин. Ол кэннэ Бырабыыталыстыба дьиэтигэр дойду премьер-миниистирэ Дмитрий Медведев спортсменнарга саҥа массыына күлүүһүн туттартаата.
Кыһыл көмүс мэтээли аҕалбыт спортсменнар BMW X6, үрүҥ көмүһү – BMW X5, оттон боруонсаны ылбыт спортсменнар BMW X4 массыыналары туттулар. 15 саастаах Алина Загитова массыынатын “төрөппүттэрбэр бэлэхтиэм” диэбит.
Дмитрий Медведев “массыына төһө да омук мааркалааҕын иһин, биһиги дойдубутугар таҥыллар, онон бэйэбит гиэнэ” диэн тоһоҕолоото.
