Бэс ыйын 15-16 күннэригэр “Юность” стадиоҥҥа доруобуйаларыгар хааччахтаах дьон ортотугар чэпчэки атлетикаҕа өрөспүүбүлүкэ чемпионата буолан ааста.
Быйылгы күрэстэһиигэ хаһааҥҥытааҕар да элбэх киһи кытынна. Ол курдук, араас улуустартан хомуллубут 23 хамаандаттан 240 кыттааччы “күөн көрүстэ”. Ол биир төрүөтүнэн норуоттар VII спортивнай оонньууларыгар сүүмэрдээһин буолар. Онон Аммаҕа ыытыллар спортивнай оонньууларга аан бастакытын адаптивнай успуорт көрүҥнэрэ киирдилэр. Ол курдук, доруобуйаларыгар хааччахтаах спортсменнар волейболга (олорон эрэ), чэпчэки атлетикаҕа күрэстэһиэхтэрэ. Чемпионат бастакы күнүгэр дьахталларга уонна эр дьоҥҥо 100 м сүүрүү, иккис күнүгэр ядрону быраҕыы уонна 200, 400, 800 м сүүрүү буолла. Икки күннээх күрэстэһии түмүгүнэн бастыҥнар билиннилэр. Кинилэр VII спортивнай оонньууларга кыттыахтара.
Василий Оленов, чэпчэки атлетика тренерэ, чемпионат сүрүн судьуйата:
— Быйылгы чемпионат олус элбэх кыттааччыны түмтэ. Спортсменнар бэлэмнэниилэрин таһыма эмиэ олус тупсубут. Күүстээх үлэ ыытыллыбыта тута харахха быраҕыллар. Инньэ гынан, хас биирдии дистанцияттан алталыы спортсмен VII спортивнай оонньууларга кыттар путевканы ыллылар. Нам, Уус-Алдан, Чурапчы уо.д.а. улуустар үрдүк көрдөрүүлээхтэр. Икки дистанция кыайыылаахтарын Татьяна Бурымы, Людмила Пахомованы, ядрону быраҕыыга Гаврил Мигалкины уонна Алена Игнатьеваны бэлиэтиэхпин баҕарабын.
Спортивнай оонньуулар чэпчэки атлетика бырагыраамматыгар 100, 200, 400 уонна 800 м сүүрүү, ону таһынан ядрону быраҕыы киирдэ. Ааспыт чемпионакка ядрону быраҕыыга 60 спортсмен кыттыбыта.
