Балаҕан ыйын 19-22 күннэригэр Казахстаҥҥа, тустууга Аан дойду чемпионата буолар. Манна араас хамаандалартан саха тустуутун оскуолатын иитиллээччилэрэ кыттыахтара. Ол курдук, Белорусияттан Владислав Андреев (57 кг), Андрей Бекренев (61 кг), Ньургун Скрябин (65 кг), Румынияттан Николай Охлопков (61 кг), Македонияттан Владимир Егоров (57 кг) уонна Филиппиныттан Егор Дмитриев (61 кг).
Саха сирин сүүмэрдэммит хамаандатын сүрүн тренерэ. Александр Оконешников, тустууга Аан дойду чемпионатыгар анаммыт төгүрүк остуолга спортсменнар хайаан да путевка ылыахтаахтар диэн эттэ. Санатар буоллахха, хас биирдии ыйааһыҥҥа квалификацияны алта тустуук ылыахтаах. Ол курдук, чемпионнар, иккис, үһүс миэстэлээхтэр уонна боруонса мэтээл иһин киирсиигэ хотторбуттар.
Олимпийскай ыйааһыннар 57, 65, 74, 86, 97, 125 кг. Онон путевка иһин үс тустуук күрэхтэһиэ. Олимпиадаҕа уопсайа 16 спортсмен кыттыа. Олортон алта спортсмен Аан дойду чемпионатыгар талыллыахтара. Атыттар квалификационнай континентальнай турнир нөҥүө киириэхтэрэ.
“Путевка иһин Владимир Егоров, Владислав Андреев уонна Ньургун Скрябин тустуохтара. Биһиги бу чемпионаты олус күүппүппүт. Уолаттар туох да иһин олимпийскай лицензияны ылыахтаахтар”, — диэн Александр Оконешников иһитиннэрдэ.
