Мииринэйгэ урукку сылларга холоотоххо, ыччат тустууга, хапсаҕайга, мас тардыһыытыгар интэриэһэ балачча улаатта.
Манна талааннаах тренердэр, тустуу энтузиастара Юрий Константинов, Ян Петров, Ньургун Иванов, Василий Корякин ахсаабат кылааттарын бэлиэтиэм этэ. Ол курдук, тустууну мииринэйдэр кэрэхсиир, таптыыр буоллулар. Саха норуотун өбүгэ саҕаттан кэлбит үтүө-мааны успуордун көрүҥүн хапсаҕайы, 28 саастаах уһуйааччы-тренер Ларион Андреев дьоҥҥо-сэргэҕэ тарҕатар. Эдэр киһи Сүлдьүкээртэн төрүттээх. Ларион Улан-Удэ куоракка Бүрээтийэ тустуутун биллиилээх оскуолатыгар эрчиллэн, бэркэ диэн сайдыбыт, тупсубут. Кини Арассыыйа успуордун маастара, үгүс Өрөспүүбүлүкэ таһымнаах күрэхтэһиилэр кыайыылааҕа. Түөрт сыл анараа өттүгэр ытык иэһин толорон, Чуумпу акыйаан флотун муора пехотатын 55-c биригээдэтигэр (Владивосток куорат) сулууспалаабыта. Онно морпехтар бойобуой чаастарын уонна флот күрэхтэһиилэригэр хаста да кыайыылааҕынан буолбута. Ити курдук, эдэр киһи кылгас кэм иһигэр баай уопуту мунньуммут. Билигин Мииринэйгэ оччугуй саастаах оҕолору, ыччаты хапсаҕайга уонна мас тардыһыытыгар үөрэтэргэ бэлэм. Эдэр уһуйааччыга ситиһиини баҕарыахайыҥ.
Станислав Алексеев, Мииринэй куората. Хаартыскаҕа Ларион Андреев.
“Спорт Якутии” саайт хаартыската.
