Ахсынньы 6-7 күннэригэр “Модун” успуорт киинигэр, СӨ үтүөлээх тренерэ Ф.М. Дегтярев сырдык кэриэһигэр мас тардыһыыга өрөспүүбүлүкэ абсолютнай чемпионата ыытыллыаҕа.
Күрэхтэһиигэ өрөспүүбүлүкэ араас муннугуттан күүстээх мадьынылар күөн көрсүөхтэрэ. Ол курдук, түөрт ыйааһыҥҥа эр дьон, кэрэ аҥаардар уонна бэтэрээннэр күрэхтэһиэхтэрэ.
Ыарахан ыйааһыҥҥа саамай тыҥааһыннаах киирсиилэр буолаллара саарбахтаммат. Ол курдук, манна барыллааһын быһыытынан Сергей Фролкин, Эрчим Баппагай, Юрий Протопопов, Денис Сивцев, Дмитрий Попов кытталлара күүтүллэр. Оттон 70 кг ыйаһыҥҥа диэри эмиэ чаҕылхай киирсиилэр буолаллара сабаҕаланар. Манна Сергей Константинов, Айсен Мигалкин, Василий Захаров, Валерий Никаноров уо.д.а. күрэхтэһиэхтэрэ.
Чемпионат мас тардыһыы норуоттар икки ардыларынааҕы федерациятын быраабылатынан ыытыллыаҕа. Сүрүн судьуйа – Дмитрий Шарин. Бириис пуондата – 200 тыһ солк . Чемпионнар уонна призердар өйдөбүнньүк мэтээллэринэн, грамоталарынан уонна сыаналаах бириистэринэн наҕараадаланыахтара. Ону таһынан, анал бириистэр туттарыллыахтара.
