Бэс ыйын 14 – от ыйын 15 күннэригэр Арассыыйаҕа Футболга аан дойду чөмпүйэнээтэ буолуоҕа. Ол эрээри бу күннэргэ Футбол аан дойдутааҕы федерацията (ФИФА) “Арассыыйаҕа буолуохтаах аан дойду чөмпүйэнээтин атын дойдулар бойкуоттуур кутталлаахтар” диэн улаханнык дьиксиммитин биллэрэр.
Билэрбит курдук, кулун тутар 4 күнүгэр Британияҕа Сергей Скрипаль диэн уруккута Арассыыйа гражданинын, ГРУ полковнигын, кимнээх эрэ күүстээх дьаатынан сүһүрдэн өлөрө сатаабыттара. Төһө да күттүөннээх дакаастабыл суоҕун иһин, Британия былаастара онно тута Арассыыйа былаастарын буруйдаабыттара. Онтон сылтаан билигин Арассыыйа-Британия икки ардыгар сыһыан муҥутуурдук тыҥаан, дипломаттыы сыһыан тохтоон кэриэтэ турар. Британиялар футбол чөмпүйэнээтигэр толору састааптаах дэлэгээссийэни ыыппаттарын эттилэр. Онтон холобур ылан, Исландия, Швеция, Дания эмиэ бу чөмпүйэнээти “бойкуоттуохпутун сөп” диэн куттууллар. Польша, Украина чөмпүйэнээккэ толору дэлэгээссийэни ыыппаттарын өссө эрдэ биллэрбиттэрэ.
