Оонньуулар чопчу ханнык күннэргэ ыыттыллаллара бу олунньу ортотугар биллиэҕэ.
СӨ успуортка уонна физическэй култуураҕа миниистирэ Иннокентий Григорьев бырабыыталыстыба быһа эфиргэ отчуотун кэмигэр бу туһунан иһитиннэрбитэ.
Кини этэринэн, ахсыс төгүлүн ыытыллар “Азия оҕолоро” Оман киин куоратыгар – Маскатка ыытыллыаҕа. Быһа барыллаан, оонньуулар балаҕан ыйыгар буолуох курдуктар. Маныаха туһааннаах кэпсэтиилэри ааспыт сыл ахсынньытыгар оонньуулар норуоттар икки ардыларынааҕы кэмитиэтэ уонна Оман олимпийскай кэмитиэтэ ыыппыт.
“Билиҥҥитэ оонньуу балаһыанньатын оҥорууга кэпсэтиилэр бараллар, олунньу 12 күнүгэр Казахстаҥҥа көрсөн эбии улахан кэпсэтии барыахтаах. Онон олунньу15-гэр эҥин биһиги ханнык көрүҥнэргэ уонна чопчу ханнык күннэргэ күрэхтэр ыытыллалларын билиэхпит”, - диэтэ Иннокентий Григорьев.
