Тренердэр, спортсменнар, спорт министиэристибэтигэр бас бэринэр тэрилтэлэр салайааччылара #барыбииргэ диэн волонтердар хамсааһыннарыгар кытталлар.
Бүгүн, муус устар 22 күнүгэр көҥүл тустуу бөҕөстөрө: Саха сирин сүүмэрдэммит хамаандатын сүрүн тренерэ Александр Оконешников, хамаанда хапытаана, норуоттар икки ардыларынааҕы кылаастаах спорт маастара Виктор Рассадин, норуоттар икки ардыларынааҕы кылаастаах спорт маастара Михаил Иванов, Арассыыйа спордун маастара Дьулустаан Булатов уонна СӨ сүүмэрдэммит хамаандатын бэлэмниир өрөспүүбүлүкэтээҕи киин үлэһитэ Эдуард Старостин ахсыйаны саҕалаатылар
Ол курдук, спорт бэтэрээннэригэр, ытык кырдьаҕастарга уонна соҕотох олорор биэнсийэлээхтэргэ ас-үөл тастылар. Волонтердар сэрэхтээх буолуу миэрлэрин тутуһаллар: мааскалаахтар, бэрчээккэлээхтэр, астаах бакыаты дьиэҕэ киллэрбэккэ аан аттыгар уураллар. Спортсменнар хамсааһыннарын СӨ сүүмэрдэммит хамаандатын бэлэмниир өрөспүүбүлүкэтээҕи киин дириэктэрин бастакы солбуйааччы Михаил Пахомов салайар.
“Билиҥҥи уустук кэмҥэ туора туран хаалыа суохтаахпыт. Атыттар эмиэ бу аахсыйаҕа кыттыахтара диэммин эрэнэбин", – диэн СӨ спордун миниистирэ Иннокентий Григорьев ыҥырар.
