«Азия оҕолоро» Норуоттар икки ардыларынааҕы спортивнай оонньуу кэмитиэтин бэрэсэдьиэнинэн Владимир Максимов анаммыт.
«Владимир Максимов кандидатуратын Ил Дархан Айсен Николаев туруорда. Владимир успуорт менеджменигэр улахан уопуттаах — 2008 сылтан «Азия оҕолоро» бырайыакка үлэлиир. 2012 уонна 2016 сылларга оонньуулары ыытыы тэрээһинигэр, ону тэҥэ Сахалиҥҥа ыытыллыбыт бастакы кыһыҥҥы норуоттар икки ардыларынааҕы оонньууга эппиэттээҕинэн анаммыта. Бэрэсэдьиэҥҥэ кандидатураны тэрийээччилэр бары өйөөтүлэр», — диэн «Азия оҕолоро» Норуоттар икки ардыларынааҕы спортивнай оонньуу кэмитиэтин генеральнай дириэктэрэ Гаврил Цыпандин иһитиннэрбит.
Кэтэхтэн куоластааһыҥҥа «Азия оҕолоро» Норуоттар икки ардыларынааҕы спортивнай оонньуу кэмитиэтин тэрийээччилэрэ кыттыбыттар. Онно Ил Дархан, Арассыыйа Олимпийскай кэмитиэтин бэрэсэдьиэнэ Станислав Поздняков уонна Азия оонньууларын Азия Олимпийскай сэбиэтин дириэктэрэ Хайдер Фарман бааллар.
