Бэҕэһээ, сэтинньи 12 күнүгэр успуорт уонна физическэй култуура миниистирэ Иннокентий Григорьев Бэрдьигэстээххэ 21-с төгүлүн ыытыллыахтаах "Манчаары Оонньууларыгар" бэлэнэнии хайдах баран иһэрин бэрэбиэркэлээтэ.
Миниистир саҥа тутулла турар элбэх функциялаах успуорт комплекс тутуутун кытары билистэ. Бу комплекс быйыл ахсынньыга үлэҕэ киириэхтээх. Маны таһынан, кини тутулла турар тир, 1000 миэстэлээх стадион уонна спартакиада кыттааччылара уонна тэрийээччилэр түһүөхтээх эбийиэктэрин кытары билистэ. Түмүккэ миниистир успуорт оскуолатыгар сырытта уонна онно эһиилги оонньуулар тэрээһиннэрин туһунан киэҥ ыҥырыылаах мунньаҕы ыытта. Бу туһунан успуорт министиэристибэтин пресс-сулууспата иһитиннэрэр.
