Муус устар 5 күнүгэр, Покровскай куоракка Өрөспүүбүлүкэтээҕи оҕо-ыччат олимпийскай эрэсиэрбэтин анал успуорт оскуолатын уораҕайыгар үөрүүлээх-быһыыга-майгыга кик-боксиҥҥа аан-дойдутааҕы чөпүйүөннэргэ бүүстэри арыйыы аһыллыыта буолла, диэн иһитиннэрэр Хаҥалас улууһун дьаһалтатын пресс-киинэ.
Бүүстэр ананнылар – кикбоксиҥҥа аан дойдутааҕы икки төгүл чөмпүйүөҥҥэ, өрөспүүбүлүкэ 1ө төгүллээх чөмпүйүөнүгэр, СССР бокска маастарыгар, Арассыыйаҕа норуоттар икки ардыларынааҕы класска кикбоксиҥҥа маастарга Хаҥалас улууһуттан төрүттээх Василий Павловка уонна кикбоксиҥҥа аан дойдутааҕы үс төгүл чөмпүйүөҥҥэ, Арассыыйаҕа тайскай бокска маҥнайгы чемпионатыгар бастаабыт Иннокентий Макаровка.
«Бүгүн биһиги мемориаллары арыйабыт икки уһулуччу чаҕылхай саха спортмсеннарыгар – Василий Павловка уонна Иннокентий Макаровка. Кинилэр ааттара оччо киэҥ далааһыннаахтар, ол иһин биһиги сүрэхтэрбитигэр эрэ буолбакка, бу бэлиэ өйдөбүнньүктэргэ хаалаллара кэрэхсэбиллээх. Кинилэр сырдык мөссүөннэрэ биһиэхэ өрүү тыыннаах,» - диэн тыл эттэ улуус баһылыга Олег Иринеев.
Чемпион Василий Павлов бүүһүттэн болотунатын устар быраап кини кэргэнигэр Татьяна Павловаҕа, балтыгар Елена Васильевнаҕа уонна спортсмен бастакы тириэнэригэр, Саха сирин физическай култууратын уонна успуордун үтүөлээх үлэһитигэр бэрилиннэ. Чемпион Иннокентий Макаров бүүһүн арыйдылар кини балта Ольга Колмакова, уола Эрхаан уонна бастакы тириэнэрэ, Арассыыйатааҕы кикбоксинг федерациятын үтүөлээх тириэнэрэ Андрей Артамонов.
Итиэннэ, бу күҥҥэ «Спортивный антиквариат» диэн успуорт албан аатын ураты түмэлин арыллыыта буолла. Светлана уонна Александр Куприяновтар дьиэ кэргэн 40 сыл тухары успуорт экспонаттарын хомуйан кэлбиттэр. Кэллиэксийэҕэ успуорт устуоруйатыгар араас хайысхалар киирбиттэр, манна ыраахтааҕы саҕанааҕы кинигэлэри көрүөххэ сөп, былыргы учуобунньуктар, ураты уонна тус бэйэлэрэ соҕотох араас турнирдартан, чемпионаттартан маллары-саллары, маны барытын спортсменнар үгүс сыл тухары анаан-минээн Куприяновтар дьиэ кэргэҥҥэ бэлэхтээбиттэр.
\
