Үөһээ Бүлүү Тамалакааныттан төрүттээх Айаал Лазарев, сахалартан бастакынан ыарахан ыйааһынҥа Аан дойду таһымнаах күрэхтэһиилэри кыайыылаах. Аан дойду кубогын биирдиилээн бастыыр иһин күрэхтэһиитигэр боруонса мэтээли ылбыта. Азия күрэхтэһиилэрин хас да төгүллээх чөмпүйүөнэ, призера. Иккис Олимпиадаҕа кыттар үрдүк чиэскэ тиксибит саха дуолан бухатыыра, мүлдьү бөҕөтө.
Хапсаҕай уйата, Үс хоһуун - Бычырдаан, Бучугурас, Мордьоно, Саха сиригэр киэҥник биллибит улуу хапсаҕайдьыттар төрөөбүт дойдуларыттан, Үөһээ Бүлүү улууһуттан төрүттээх, "Манчаары оонньууларын" Муҥутуур кыайыылааҕа, Егор Прокопьев – Чөҥкөй, Арассыыйа марафонҥа 5 төгүллээх кыайыылааҕа Сардаана Трофимова төрөөбүт үөскээбит, силис-мутук тардыбыт төрүт сирдэриттэн Тамалакаан нэһилиэгиттэн төрүттээх биһиги Айаалбыт. Билигин кини Аан дойду кылаастаах успуорт маастарыгар тиийэ үүннэ, Олимпиадаҕа иккис төгүл кыттар быраап ылла.
Үөһээ Бүлүүлэр ааттарыттан саха дьонун барытын ыҥыран туран, Айаал Лазарев мөссүөнэ ойуулаах футболкалары, бейсболкалары сакаастаан, киниэхэ дойдутун дьонун-сэргэтин аатыттан алгыстаан, арчылаан күүһүгэр күүс эбиэҕиҥ диэн ыҥырабыт!
Степан Дмитриев
Балаҕаннаах нэһилиэгин баһылыга , Саха өрөспүүбүлүкэтин норуотун хаһаайыстыбатын үтүөлээх үлэһитэ
Балаҕаннаах, от ыйын 7 күнэ 2021 сыл .
