Өрөспүүбүлүкэ барыта долгуйа кэтэһэр Оонньуулара саҕаланна. Бары билэрбит курдук, саха төрүт успуордун көрүҥнэрэ саҥа таһымҥа таҕыстылар, кинилэри үгүс дойдуга билэр буоллулар. Оттон онно аҥаардас Успуорт министиэристибэтэ уонна федерациялара эрэ буолбакка, биисинэс эмиэ көмөлөһөр. Ол курдук, АЛРОСА өссө төгүл “Манчаары оонньуулара” успуорт национальнай көрүҥнэрин ХХI спартакиадатын официальнай партнера буолла.
“Манчаары оонньуулара” спартакиада хатыламмат ураты тыыннаах, кэрэхсэллээх туспа эйгэлээх. Кини ыһыах тэҥэ үтүө тэрээһин. Бу биирдиилээн спортсменнар уонна успуорт көрүҥнэрин туһугар ис сүрэхтэриттэн ыалдьар спортсменнар уонна көрөөччүлэр алтыһыылара. Аангылыйа олохтоохторо футболга эбэтэр Эмиэрикэ дьоно-сэргэ бейсболга умсугуйалларын, онон үлүһүйэллэрин тэҥэ, бу төрүт көрүҥнэр биһиги эппитигэр-хааммытыгар иҥэн сылдьаллар. Күн бүгүн успуорт төрүт көрүҥнэрэ элбэх омуктаах уопсастыбаны сомоҕолууллар, норуоттар уонна култууралар алтыһыыларын бөҕөргөтөллөр, култуура нэһилиэстибэтин харыстыыллар, ону тэҥэ бүтүн нация духуобунай уонна этин-хаанын туругун хараанныыллар.
Быйыл “Манчаары Оонньуулара” аан бастакытын көрөөччүтэ суох ыытыллар уонна онлайн көрдөрдүлэр.
Оонньуу биир сүрүн уратыта – сырыы аайы ыыталлар сирэ уларыйар. 2017 сыллаахха от ыйын 10 күнүгэр ХХ үбүлүөйдээх спартакиада Үөһээ Бүлүү улууһугар буолбута.
Иннокентий Григорьев: “Биһиги биир соруктаахпыт”
– Саха Өрөспүүбүлүкэтин Физическэй култуураҕа уонна успуорка министиэристибэтэ “Манчаары оонньуулара” успуорт национальнай көрүҥнэрин спартакиадатын официальнай партнера буолбут АЛРОСА хампаанньа салалтатыгар өйөбүллэрин иһин улаханнык махтанабыт.
Биһиги биир соруктаахпыт – маассабай успуорт уонна физическэй култуура олохпут быстыспат сорҕото, тутаах көстүүтэ буоларын туһугар үлэлиибит. Хоруона хамсыга олох-дьаһах бары эйгэтин хаарыйда, хас биирдии киһи бэйэтин уонна чугас дьонун доруобуйатыгар болҕомтолоохтук сыһыаннаһар буолла. Дьон-сэргэ эти-хааны уонна иммунитеты успуорт уонна чөл олох көмөтүнэн чөл тута сылдьыахха сөбүн өйдөөтө.
Итини таһынан, Саха сиригэр АЛРОСА көмөтүнэн оҕо успуорда сайдар, мас тардыһыытын аан дойду таһымыгар көҕүлүүр улахан социальнай бырайыак олоххо киирэр, – диэн успуорт миниистирэ Иннокентий Григорьев кэпсиир.
Оонньуу биир сүрүн уратыта – сырыы аайы ыыталлар сирэ уларыйар. 2017 сыллаахха от ыйын 10 күнүгэр ХХ үбүлүөйдээх спартакиада Үөһээ Бүлүү улууһугар буолбута.
“Манчаары оонньууларын” бырагырааматыгар успуорт 11 көрүҥэ киирэр: хапсаҕай, мас тардыһыыта, атах оонньуута, гиирэ успуорда, национальнай многоборье, чэпчэки атлетика, ох саанан ытыы, буулдьанан ытыы, хотугу многоборье (хотугу үс төгүл үс, ураҕастаах сүүрүү, сүгэни, маамыктаны быраҕыы, наартаны ойуу), ат сүүрдүүтэ, остуол оонньуута (хабылык уонна хаамыска).
– “Манчаары оонньуулара” – Саха сирин норуоттарын национальнай киэн тутуута. Кини төрүт үгэс уонна көлүөнэлэр ситимнэһиилэрин көрдөрөр. Оттон биһиги, билигин үлэлии-хамсыы сылдьар дьон, ону ыччаппытыгар тиэрдэр соруктаахпыт. Түөрт сыл буола-буола “Манчаары оонньууларыгар” Олимпиада оонньууларын курдук бастыҥтан бастыҥнар түмсэн, чиэһинэй уонна сиэрдээх күрэстэргэ илин-кэлин түсүһэллэр, – диэн Саха сиригэр биллэр успуорт суруналыыһа, успуорт түмэлин дириэктэрэ Михаил Друзьянов санаатын үллэстэр.
Өрөспүүбүлүкэ күрэхтэһиилэрин уонна успуорт көрүҥнэрин федерацияларын үбүлээһин – АЛРОСА успуорду өйүүр үлэтин сорҕото эрэ. Ол курдук, хас даҕаны сыллааҕыта “АЛРОСА” култуура-успуорт комплексыгар мэлдьитин дьарыктанар хампаанньа үлэһиттэрин, кинилэр оҕолорун уонна Мииринэй улууһун олохтооохторун ахсаанын элбэтэр сорук турбута. Ол иһигэр култуурунай-спортивнай эбийиэктэргэ үлэлиир оҕо успуорда өйөнүөхтээҕэ, эдэр спортсменнар улуус уонна Саха сирин таһыгар күрэхтэһиилэргэ, куонкурустарга, бэстибээллэргэ бараллара-кэлэллэрэ элбиэхтээҕэ, успуорт сиэксийэлэрин уонна айар холбоһуктар матырыйаалынай-тэхиниичэскэй базалара бөҕөргүөхтээҕэ, КСК тириэньэрдэрин, уһуйааччыларын идэлэрин таһыма үрдэтиллиэхтээҕэ.
2019 сылтан КСК-лар успуорт төрүт көрүҥнэрин сайыннарарга ылсыбыттара. Хампаанньа өйөбүлүн көмөтүнэн, успуорт төрүт көрүҥнэринэн Мииринэй дьоно бары дьарыктанар кыахтаннылар. КСК-ҕа саҥа сиэксийэни арыйыах иннинэ АЛРОСА исписэлиистэрэ нэһилиэнньэ тугунан дьарыктаныан баҕарарын сураспыттара, ыйытык оҥорбуттара. Ол түмүгүнэн, үгүс киһи хапсаҕайынан уонна мас тардыһыытынан дьарыктаныан баҕарара биллибитэ. Онон ити чааһыгар “хампаанньа уопсастыба үлэҕин толорор” диэххэ сөп.
Быйыл “Манчаары оонньуулара” Саха АССР тэриллибитэ 100 сыллаах үбүлүөйүн
бэлиэтиир тэрээһиннэр чэрчилэринэн ыытыллар.
Итини таһынан, Саха сирин олохтоохторо эдэр атлеттарга уонна успуорт уопсастыбаннаһын ортотугар тэриллэр “АЛРОСА настарыанньата” бэстибээли биһирээтилэр. Бу бэстибээл чэрчитинэн ааттаах-суоллаах, биллэр-көстөр спортсменнар, Арассыыйа, норуоттар икки ардыларынааҕы, аан дойду таһымнаах күрэхтэһиилэр кыайыылаахтара өрөспүүбүлүкэ улуустарыгар-куораттарыгар сылдьан, нэһилиэнньэни кытта көрсөллөр, маастар-кылаастары тэрийэллэр, уопуттарын үллэстэллэр. Итини сэргэ хампаанньа успуорка дьоҕурдаах оҕолору сүүмэрдиир “Чөмпүйүөн буол!” федеральнай бырайыакка кыттар.
Санаттахха, АЛРОСА “Манчаары оонньуулара” успуорт национальнай көрүҥнэрин спартакиадатын таһынан, “Азия оҕолоро” норуоттар икки ардыларынааҕы оонньуу, Саха Өрөспүүбүлүкэтин норуоттарын спортивнай оонньуутун тэрээһинигэр көмөлөһөр, мас тырдыһыыта аан дойду таһымыгар тахсыытыгар кылаатын киллэрэр.
АЛРОСА бэйэтин эрэгийиэнин социальнай бэлиитикэтигэр улахан болҕомтотун уурар. Ол аҥаардас Саха Өрөспүүбүлүкэтин бүддьүөтүн 40 %-нын толоруунан эрэ муҥурдаммат. Хампаанньа Саха сирин социальнай бырайыактарыгар анаан 10-нуу млрд солкуобайы биэрэр. Ол курдук, алмаастаах хампаанньа араас хайысхалаах 500 социальнай бырайыагы олоххо киллэрэргэ үлэлэһэр. Ол иһигэр успуорт эбийиэктэрин тутар, Арассыыйа таһымнаах успуорт күрэхтэһиилэрин тэрийэр.
Андрей ШИЛОВ бэлэмнээтэ
