Чурапчы улууһуттан төрүттээх, норуоттар икки ардыларынааҕы гроссмейстер Матрена Ноговицына, болдьох бүтэ илигинэ, биир туур иһигэр сүүс харахтаах дуобакка аан дойду чөмпүйүөҥкэтинэн буолла. Күөн күрэс Эстония куоратыгар Таллиҥҥа буолан ааста.
Чурапчы улууһун баһылыга Андрей Ноговицын маннык диэн тыл эттэ: «Чаҕылхай спортсменкабытын, кини тириэнэрдэрин, өрөспүүбүлүкэ дуобатын Федерациятын итиитик истиҥник эҕэрдэлиибин! Хаһыс да төгүлүн биһиги спортсменнарбыт, төрөөбүт улуустарын чиэһин көмүскээтилэр. Биһиги Матренабыт – Саха сирин устуоруйатыгар, бу көрүҥҥэ бастакытын инники күөҥҥэ таҕыста, оттон Арассыыйа таһымыгар классическай бырагырааммаҕа иккис бочуоттаах миэстэҕэ тигистэ. Чурапчы улууһугар физическай култуура уонна маассабай успуорт сайдарыгар улахан болҕомто ууруллар».
Кыайыылаах ийэтэ – Мария Николаевна кэпсиир: “Матрена дуобатчыттар уонна “техническай идэлээх” аймах-билэ дьон ортотугар улааппыта. Аҕата – Степан Тимофеевич – дуобакка успуорт маастарын хандьыдаата. Аҕата, убайдара, бырааттар бары –удьуор дуобатчыттар. Оттон мин өртүбүнэн дьонум бүттүүн – техническай идэлэри баһылаабыттара.
Матрена оҕо эрдэҕиттэн, букатын биэс сааһыттан дуобакка умсугуйан туран оонньообута. Бэл, оҕо уһуйааныгар оонньуура, кэлин оскуолаҕа да таптыыр дьарыгын бырахпатаҕа.
Тугунан эрэ атынынан дьарыктанарын сатаан харахпар ойуулаан көрбөппүн. Биллэн турар иллэҥ бириэмэ киниэхэ адьас суох. Ол эрээри оннук быыс-арыт көһүннэҕинэ, биһиги айылҕа күөнүгэр тахсан дьиэ кэргэнинэн сынньанарбытын туохтааҕар да ордоробут. Кыыһым кинигэ ааҕарын олус сөбүлүүр, доҕотторун кытта көрсөн алтыһар, ас астыырын астынар. Мин кини ийэтэ буоларым быһыытынан, оҕобор үрдүк успуортка ситиһиилэрин таһынан, сирдээҕи тапталы уонна ийэ буолар дьолу билэригэр ис сүрэхпиттэн баҕарыам этэ. Оҕом барахсан күлэр ээ, классическай дуобакка аан дойду чөмпүйүөҥкэтэ буоллахпына биирдэ ыал буолуом диэн».
“Чурапчы улууһа” олохтоох дьаһалта пресс-сулууспата
